ޒަޕޮރިއްޒިޒިއާ ނިޔުކްލިއާ ޕްލާންޓް ހިފަން ޔޫކްރެއިނުން ހުކުރު ދުވަހުގެ ރޭ ކުރި މަސައްކަތް ފެއިލްކޮށްލާފައިވާ ކަމަށް ރަޝިއާއިން ބުނެފި އެވެ.
ރަޝިއާ ޑިފެންސް މިނިސްޓްރީން ބުނީ ޔޫކްރެއިންގެ 250 ސިފައިން ޕްލާންޓް ކައިރީގައި އޮންނަ ފެންގަނޑެއްގެ އައްސޭރިފަށަށް އަރަން މަސައްކަތް ކުރި ކަމަށެވެ.
"އިންޓަނޭޝަނަލް އެޓޮމިކް އެނާޖީ އެޖެންސީ (އައިއޭއީއޭ)ގެ އޮފިޝަލުން ޒަޕޮރިއްޒިޒިއާ ޕްލާންޓްގައި ތިބި ނަމަވެސް، ޔޫކްރެއިނުން ތަކުރާާރުކޮށް މަސައްކަތް ކުރީ އެ ޕްލާންޓް ހިފަން،" ރަޝިއާގެ ޑިފެންސް މިނިސްޓްރީން ބުންޏެވެ.
ރަޝިއާއިން ބުނީ ޔޫކްރެއިނުން ދޭން ރޭވި ހަމަލާ ހުއްޓުވީ ހެލިކޮޕްޓަަރާއި ހަނގުރާމަ މަތީ ޖެޓު ބޭނުންކޮށްގެން ކަމަށާއި ޔޫކްރެއިންގެ 20 ކަނޑުގެ އުޅަނދު ހަލާކުވި ކަމަަށެވެ.
ޔޫކްރެއިންގެ ދެކުނުގައި ހުންނަ އެ ޕްލާންޓް ރަޝިއާއިން ހިފީ މާޗް މަހުގަަ އެވެ. ނަމަވެސް އެ ތަނުގެ މުވައްޒަފުންގެ ގޮތުގައި އަަދިވެސް ތިބީ ޔޫކްރެއިން މީހުންނެވެ.
ފަހަކަށް އައިސް އެ ޕްލާންޓަށް ހަމަލާ ދިނުން އިތުރުވެފައިވާ އިރު، ރަޝިއާ އާއި ޔޫކްރެއިނުން ތުހުމަތު ކުރަނީ އެއް ބަޔަކު އަނެއް ބަޔަކަށެވެ.
