ލެސްޓާ (ސެޕްޓެމްބަރު 2) - މެޗުގެ ފުރަތަމަ ހާފުގައި ޖޭޑަން ސަންޗޯ ޖެހި ލަނޑާ އެކު، އިނގިރޭސި ޕްރިމިއާ ލީގުގައި ރޭ ލެސްޓާ ސިޓީ އަތުން 1-0 އިން މެންޗެސްޓާ ޔުނައިޓަޑް މޮޅުވެއްޖެ އެވެ.
މިއީ މި ފަހަރުގެ ލީގު ސީޒަންގައި ފުރަތަމަ ދެ މެޗުން ބަލިވި ޔުނައިޓެޑުން ޖެހިޖެހިގެން ހޯދި ތިން ވަނަ މޮޅެވެ. މި މޮޅާ އެކު ޔުނައިޓެޑް އޮތީ ފަސް މެޗުން ނުވަ ޕޮއިންޓް ހޯދައިގެން ފަސް ވަނައިގަ އެވެ. ލެސްޓާ ލީގުގެ ފުލުގައި އޮތީ ފަސް މެޗުން އެއް ޕޮއިންޓް ހޯދައިގެންނެވެ. ލީގުގައި މޮޅެއް ނުލިބި އޮތް ތިން ޓީމުގެ ތެރޭގައި ލެސްޓާ ހިމެނެ އެެވެ.
ލެސްޓާގެ ދަނޑުގައި ކުޅުނު މެޗުން ޔުނައިޓަޑް މޮޅުވީ މެޗުގެ ފުރަތަމަ ހާފުގައި ޔުނައިޓަޑްގެ ސަންޗޯ ކާމިޔާބުކުރި ލަނޑާ އެކު އެވެ. މި މޮޅާ އެކު ޔުނައިޓަޑް ވަނީ ތާވަލުގެ ފަސް ވަނަ އަށް ޖެހިލައިފަ އެވެ.
ޔުނައިޓަޑްގެ ހަމައެކަނި ލަނޑު މެޗުގެ 23 ވަނަ މިނިޓުގައި ސަންޗޯ ކާމިޔާބުކުރީ އެ ޓީމުގެ ފޯވަޑް މާކަސް ރަޝްފޯޑް ތަނަވަސްކޮށްދިން ފުރުސަތަކުންނެވެ. އޭރިޔާ ތެރެއިން ލިބުނު ބޯޅަ ސަންޗޯ ގޯލަށް އަމާޒުކޮށްލީ ލެސްޓާގެ ގޯލްކީޕަރު، ޑެނީ ވާޑް ކައިރިން ނައްޓާލުމަށް ފަހު އެވެ.
އަމިއްލަ ދަނޑުގައި ޔުނައިޓަޑް އަތުން ބަލިވެ، ލެސްޓާ އޮތީ ތާވަލްގެ ފުލުގަ އެވެ. މި ސީޒަންގައި ލެސްޓާ އަދި މެޗަކުން މޮޅުނުވެ އެވެ.
މުޅި މެޗުގައި ވެސް ލެސްޓާ އިން ޔުނައިޓަޑްގެ ގޯލަށް ފޮނުވާލި އެންމެ ނުރައްކާތެރި ހަމަލާއަކީ ޖޭމްސް މެޑިސަން ހިލޭޖެހުމަކުން ފޮނުވާލި ޝޮޓެވެ. މެޑިސަންގެ ހަމަލާ ޔުނައިޓަޑްގެ ގޯލްކީޕަރު ޑޭވިޑް ޑެހެއާ ވަނީ ދިފާއުކޮށްފަ އެވެ.
ރޭގެ މެޗަށް ވެސް ޔުނައިޓަޑްގެ ކޯޗު އެރިކް ޓެން ހާގް ނެރުނު ފުރަތަމަ 11 ގައި ކްރިސްޓިއާނޯ ރޮނާލްޑޯ އާއި ޔުނައިޓަޑްގެ ކެޕްޓަން ހެރީ މެގުއާ އަށް ޖާގައެއް ނުލިބުނެވެ. އެކަމަކު، ރޮނާލްޑޯ ވަނީ ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެން އަރައިފަ އެވެ.
ޔުނައިޓެޑުން މި މެޗުގައި ފުރަަތަމަ ހާފުގައި ޖެހި ގޯލުން މޮޅުވިއިރު، އެ ޓީމު ޕްރިމިއާ ލީގުގައި އެންމެ ފަހުން ފުރަތަމަ ހާފުގައި ލީޑުގައި އޮވެގެން ނިންމާލި 119 މެޗުގައި ވެސް ބަލިވެފައިނުވެ އެވެ.
