ރަޝިއާއިން ކޮންޓްރޯލް ކުރަމުންދާ ޔޫކްރެއިންގެ ޒަޕޮރިއްޒިޒިއާ ނިޔުކްލިއާ ޕްލާންޓްގެ ފުރަތަމަ އިންސްޕެކްޝަން އދ. ގެ ޓީމުން ކުރިއަށް ގެންގޮސްފި އެވެ.
އިންޓަނޭޝަނަަލް އެޓޮމިކް އެނާޖީ އެޖެންސީ (އައިއޭއީއޭ) ގެ ވެރިޔާ ވިދާޅުވީ ޕްލާންޓުން ބަލަން ޖެހޭ ހުރިހާ ތަނެއް ބަލައި އިންސްޕެކްޓްކޮށްފައިވާ ކަމަށެވެ.
އދ. ގެ ޓީމުން އެ ޕްލާންޓްއާ ހަމައަށް ދިޔައީ ރަޝިއާގެ ސިފައިންނާ އެކުގަ އެވެ.
ޔޫކްރެއިންގެ ދެކުނުގައި ހުންނަ ޒަޕޮރިއްޒިޒިއާ ނިޔުކްލިއާ ޕްލާންޓަކީ ޔޫރަޕްގެ އެންމެ ބޮޑު ނިޔުކްލިއާ ޕްލާންޓެވެ. މާޗް މަހުން ފެށިގެން އެ ތަން ކޮންޓްރޯލް ކުރަނީ ރަޝިއާއިންނެވެ.
އެހެން ނަމަވެސް އެ ތަން އޮޕަރޭޓް ކުރަނީ ޔޫކްރެއިންގެ މުވައްޒަފުންނެވެ. އެ މީހުން ތުހުމަތު ކުރާ ގޮތުގައި ރަޝިއާއިން ޕްލާންޓް ބޭނުން ކުރަަނީ އަސްކަރީ މަރުކަޒެއްގެ ގޮތުގަ އެވެ.
އައިއޭއީއޭގެ ވެރިޔާ ރަފައެލް ގްރޮސީ ވިދާޅުވީ އިންސްޕެކްޝަން ޓީމުން ޕްލާންޓްގައި މަޑު ކުރާނެ ކަމަށެވެ. އެކަމަކު އެއީ ކިހާ އަދަދެއްގެ މީހުން ކަމެއް އަދި މަޑު ކުރާނީ ކިހާ ދުވަހަކަަށް ކަމެއް ސާފެއް ނޫނެވެ.
ރަޝިއާގެ އިންޓަފެކްސް ނިއުސް އެޖެންސީން ބުނީ އދ. ގެ ޓީމުގެ 8-12 މީހުން މަޑު ކުރާނެ ކަމަށެވެ. އެކަމަކު ޔޫކްރެއިންގެ ނިޔުކްލިއާ ކުންފުނި އެނާޖޯއެޓޮމްއިން ބުނީ މަޑު ކުރާނީ ފަސް މީހުން ކަމަށެވެ.
އެ ޓީމުގެ އުއްމީދަކީ ނިޔުކްލިއާ ޕްލާންޓްގެ ހާލަތު ވަޒަަންކޮށް، އެ ތަނުގައި ބަންދުވެފައި ތިބި ޔޫކްރެއިން މުވައްޒަފުންނާ މުއާމަލާތު ކުރުމެވެ.
