ރަޝިއާގެ ތެޔޮ ކުންފުނި ލުކްއޮއިލްގެ ޗެއާމަން ރަނިލް މަގަނޯވް މޮސްކޯގެ ހޮސްޕިޓަލެއްގެ ކުޑަދޮރުން ވެއްޓި މަރުވެއްޖެ އެވެ.
އުމުރުން 67 އަހަރުގެ މަަގަނޯވް ދިޔައީ ސެންޓްރަލް ކްލިނިކަލް ހޮސްޕިޓަލުން ފަރުވާ ހޯދަމުންނެވެ. އޭނާ މަރުވީ ކުޑަދޮރުން ވެއްޓި ލިބުނު ޒަހަމްތަކުގަ އެވެ.
ފަހަކަށް އައިސް ރަޝިއާގައި ނަން މަޝްހޫރު ބޮޑެތި ވިޔަފާރިވެރިން އާދަޔާ ހިލާފު ކުއްލި ގޮތް ގޮތަށް މަރުވުން ވަަނީ އިތުރުވެފަ އެވެ.
މިދިޔަ ފެބްރުއަރީ މަހު ރަޝިއާއިން ޔޫކްރެއިންގައި ހަނގުރާމަ ފެށުމުން، ހަނގުރާމަ ނިމުމަކަށް ގެންނަން އެންމެ ފުރަތަމަ ގޮވާލި ވިޔަފާރިވެރިންގެ ތެރޭގައި މަގަނޯވް ހިމެނެ އެވެ.
މާޗް މަހުގެ ކުރީކޮޅު ލުކްއޮއިލް ކުންފުނީގެ ބޯޑުން ގޮވާލީ ހަނގުރާމަ ވީ އެންމެ އަވަހަކަށް ނިންމުމަށެވެ. އަދި ހަނގުރާމައިގެ ޝިކާރައަކަށްވާ މީހުންނާ މެދު ހިތާމަ ފާޅުކުރި އެވެ.
ލުކްއޮއިލްގެ ޗެއާމަން ކަމަށް މަގަނޯވް އައީ މީގެ ދެ އަހަރު ކުރިންނެވެ. އެ ކުންފުނީގައި އޭނާ މަސައްކަތް ކުރީ ފެށީ 1993 ގަ އެވެ.
މިދިޔަ މޭ މަހު ލުކްއޮއިލްގެ ކުރީގެ އިސް މެނޭޖަރު އެލެގްޒެންޑާ ސުބޮޓިން ވެސް ކުއްލި ގޮތަކަށް މަރުވި އެވެ.
