މަޝްހޫރު ޕްރެސެންޓަރު އާމިނަތު މައުރީނާ (މައު)ގެ ރެސްޓޯރެންޓްގެ ބިއްލޫރިގަނޑު ގަލަކުން ޖަހައި މިރޭ ތަޅާލައިފި އެވެ.
ހުޅުމާލޭ ނިރޮޅުމަގުގައި ހުންނަ މިނޫޝިއާގެ ބިއްލޫރިގަނޑު ތަޅާލީ ދަންވަރު 12:15 ގަ އެވެ. އެއީ ބަންދު ވަގުތަކަށް ވިޔަސް، އެތެރޭގައި ބައެއް މުވައްޒަފުން އުޅެމުން ދިޔަ އެވެ.
މަޝްހޫރު ޕްރެޒެންޓަރު މައުރީނާ (މައު) -- ފޮޓޯ: އަދަދު
ސީސީޓީވީގެ ފުޓޭޖުން ފެންނަ ގޮތުގައި ހަމަލާ ދިން މީހާ ހުރީ ހެލްމެޓެއް އަޅައިގެންނެވެ. ރެސްޓޯރެންޓްގެ ކުރިމަތީގައި ހުރެ ބިއްލޫރިގަނޑު ތަޅާލުމަށް ފަހު އޭނާ ބާރަށް ގޮސް ފިލަ އެވެ.
މި ހަމަލާގައި އެއްވެސް މީހަކަށް އަނިޔާއެއް ނުވެ އެވެ.
މޯލްޑިވިއަން އައިޑޮލްގެ ފުރަތަމަ ސީޒަންގެ ޕްރެޒެންޓަރެއްގެ ގޮތުގައި ވިދާލި މައު، އެފްއޭއެމްގެ ރައީސް ބައްސާމް އަދީލް ޖަލީލާ، 2018 ގައި ކައިވެނި ބައްލަވައިގަތުމަށް ފަހު، ކެއްކުމުގެ ދާއިރާއިން ފެނިގެން ދިޔަ އެވެ. ޝެފެއްގެ ގޮތުގައި ވީޑިއޯ ޝޯ ވެސް އުފައްދަ އެވެ.
އެ ޝައުގުގެ ތެރެއިން އުފަންވި މިނޫޝިއާ ހުޅުވީ 2020 ގެ ސެޕްޓެމްބަރުގަ އެވެ.
ރެސްޓޯރެންޓްގެ ބިއްލޫރިގަނޑު ތަޅާލި މައްސަލައިގައި ފުލުހުންގެ ބަހެއް އަދި ނުލިބެ އެވެ.
