ސުލްހަވެރިކަމާ އެކު ފިނި ހަނގުރާމަ ނިމުމަކަށް ގެންނެވި ސޯވިއެޓް ޔޫނިއަންގެ އެންމެ ފަހު ލީޑަރު މީކާއިލް ގޮރްބަޗޭވް އުމުރުފުޅުން 91 އަހަރުގައި އަވަހާރަވެއްޖެ އެވެ.
ސޯވިއެޓް ޔޫނިއަންގެ ލީޑަރުކަމަށް ގޮރްބަޗޭވް ވަޑައިގެންނެވީ 1985 ގަ އެވެ. މުޅި ދުނިޔެއަށް ސޯވިއެޓް ޔޫނިއަން ހުޅުވާލައި، އިސްލާހީ ބަދަލުތަކެއް އެމަނިކުފާނު ގެންނެވި އެވެ.
އެހެން ނަމަވެސް، ސޯވިއެޓް ޔޫނިއަން އުވިގެން ދިޔުން ހުއްޓުވުމަށް ގޮރްބަޗޭވްއަށް މާ ގިނަ މަސައްކަތްތަކެއް ނުކުރެއްވެ އެވެ. މި ޒަމާނުގެ ރަޝިއާ އުފެދިގެން އައީ ސޯވިއެޓް ޔޫނިއަަން އުވުމުންނެވެ.
ގޮރްބަޗޭވް އަވަހާރަވުމުން ދުނިޔޭގެ ލީޑަރުން ހިތާމަ ފާޅުކުރަމުންދާ އިރު، އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް ވިދާޅުވީ އެއީ ތާރީހުގެ މިސްރާބު ބަދަލުކުރެއްވި ބޭފުޅެއް ކަމަށެވެ.
ގޮރްބަޗޭވް އަވަހާރަވީ މޮސްކޯގެ ހޮސްޕިޓަލެއްގަ އެވެ. އެ ތަނުގެ އޮފިޝަލުން ބުނީ އެމަނިކުފާނު ގެންދެވީ ދިގު އަދި ސީރިއަސް ބައްޔަކަށް ފަރުވާ ހޯއްދަވަމުން ކަމަށެވެ.
ރަޝިއާގެ ރައީސް ލެޑިމިއަ ޕުޓިން އާއި އެމެރިކާގެ ރައީސް ޖޯ ބައިޑެން ވެސް ވަނީ ގޮރްބަޗޭވް އަވަހާރަވުމާ ގުޅިގެން ތައުޒިޔާގެ މެސެޖު ފޮނުއްވާފަ އެވެ.
ހުޅަނގުގެ ގައުމުތަަކުގައި ގޮރްބަޗޭވްއަކީ މަގްބޫލް ލީޑަރެއް ނަމަވެސް، ރަޝިއާގެ ގިނަ ބަޔަކު ދެކޭ ގޮތުގައި ސޯވިއެޓް ޔޫނިއަން އުވިގެން ގޮސް ގައުމު ހަލަބޮލިވީ ގޮރްބަޗޭވްގެ ސަބަބުންނެވެ.
