ދައުލަތުގެ އެއްވެސް ރަސްމީ އިދާރާއަކުން ނަގަން ޖެހޭ ހުއްދައެއް ނުނަގާ ބަނގުރާ ހުރި ހަތަރު ފުޅިއެއް ގެންގުޅުނު މީހަކު ދައުލަތަށް 9،800 ރ. ގެ ޖޫރިމަނާއެއް ދައްކަން ކްރިމިނަލް ކޯޓުން ހުކުމްކޮށްފި އެވެ.
ކޯޓަށް ހުށަހަޅާފައިވާ މައްސަލާގައި ބުނާ ގޮތުން، މީގެ ހަތަރު ފުޅިއެއް ފުލުހުން ހޯދީ ފެބްރުއަރީ 23، 2020 ގައި އއ. މަތިވެރިއަށް ދަތުރުކުރަމުން ދިޔަ ލޯންޗަކުންނެވެ.
ބަނގުރާ ހުރި ހަތަރު ފުޅިއަކީ ބެލަންޓައިންސް ބްރޭންޑްގެ 1 ލީޓަރުގެ ފުޅިތަކެކެވެ. އޭގައި ހުރި ތަކެތި ޓެސްޓް ކުރުމުން ބަނގުއާތްވަށް ޕޮޒިޓިވް ވެފައިވެ އެވެ.
މި މައްސަލާގައި ދައުވާ ކޮށްފައިވާ މީހާ ޝަރީއަތުގައި ވަނީ ކުށަށް އިއުތިރާފުވެފަ އެވެ. އޭނައަށް ކުރާ ދައުވާއަކީ ހުއްދަ ނަގައިގެން ކުރަން ޖެހޭ ކަމެއް ހުއްދަ ނުނަގާ ކުރުމުގެ ކުށުގެ ދައުވާ އެވެ.
ގާނޫނުލް އުގޫބާތުގައި މި ކުށުގެ އަސާސީ އަދަބަކަށް އޮންނަނީ ދެ މަހާއި 12 ދުވަހަށް ޖަލަށް ލުމެވެ. ކުށަށް އިއުތިރާފުވާނަމަ ކަނޑައެޅޭ އަދަބަކީ އެއް މަހާއި 24 ދުވަހަށް ޖަލަށް ލުމެވެ.
މިއީ ގާނޫނުގައި ޖިނާއީ ބޮޑު ކުށަކަށް ނުވާއިރު، ކުށަށް އިއުތިރާފުވެ އަދަބު ލުއިކޮށްދޭން ދައުވާ ރައްދުވާ މީހާ އެދިފައިވުމަށް ރިއާޔަތްކޮށް މައްސަލަ ބައްލަވާ ގާޒީ ހަސަން ސައީދު ނިންމެވީ ޖޫރިމަނާއަށް އޭނާގެ އަދަބު ލުއިކޮށްދިނުމަށެވެ.
ކުށަށް އިއުތިރާފުވެފައިވާ މީހަކީ ލޯންޗެއްގައި ކައްޕިއެއްގެ ވަޒީފާ މިހާރު ވެސް އަދާ ކުރަމުންދާ މީހެކެވެ.
ޖަލު ހުކުމުގެ އަދަބު ޖޫރިމަނާއަށް ބަދަލުކުރާނަމަ ކަނޑައެޅޭ އަދަބަކީ 9،800 ރ. އިން ޖޫރިމަނާ ކުރުން ކަމަށް ހުކުމުގައިވެ އެވެ. އެ ފައިސާ ދެ މަސް ދުވަހުގެ ތެރޭގައި މީރާއަށް ދެއްކުމަށް ހުކުމުގައިވެ އެވެ.
