އދ. ގެ ނިޔުކްލިއާ ހަކަތައާ ބެހޭ އިދާރާގެ އިންސްޕެކްޝަން ޓީމެއް ޔޫކްރެއިންގެ ޒަޕޮރިއްޒިޒިއާ ނިޔުކްލިއާ ޕްލާންޓަށް ހިނގައްޖެ އެވެ.
އިންޓަނޭޝަނަލް އެޓޮމިކް އެނާޖީ އެޖެންސީ (އައިއޭއީއޭ) ގެ ޑިރެކްޓަރު ޖެނެރަލް ރަފައެލް ގްރޮސީ ވިދާޅުވީ އެ ޓީމު ޕްލާންޓްއާ ހަމައަށް ފޯރާނީ މި ހަފްތާގެ ފަހުކޮޅުގައި ކަމަށެވެ.
"ޔޫކްރެއިނާއި ޔޫރަޕްގެ އެންމެ ބޮޑު ނިޔުކްލިއާ ފެސިލިޓީ ރައްކާތެރިކޮށް ބަލަހައްޓަން ޖެހޭނެ،" އޭނާ ކުރެއްވި ޓްވީޓެއްގައި ވިދާޅުވި އެވެ.
މިދިޔަ މާޗް މަހުން ފެށިގެން އެ ޕްލާންޓް ކޮންޓްރޯލް ކުރަނީ ރަޝިއާއިންނެވެ. އެކަމަކު އެ ޕްލާންޓް އޮޕަަރޭޓް ކުރަނީ ޔޫކްރެއިންގެ މުވައްޒަފުންނެވެ.
ޕްލާންޓް ކައިރީގައި ހަނގުރާމަ ކުރުން އިތުރުވެ، ޕްލާންޓަށް ގެއްލުން ލިބެމުން ދާާތީ ރޭޑިއޭޝަން ލީކުވުމުގެ ނުރައްކާ އެބަ އޮތް ކަމަށް އެ ތަން އޮޕަރޭޓް ކުރާ ކުންފުނިން ބުނެ އެވެ.
ހަމަލާތަކާ ގުޅިގެން ޔޫކްރެއިނާއި ރަޝިއާއިން ތުހުމަތު ކުރަނީ އެއް ގައުމު އަނެއް ގައުމަށެވެ.
