ކުރިން އިނގިރޭސިވިލާތުގެ ނުހެދޭ ބާވަތުގެ "އެގްޒޯޓިކް" ގަސްތައް މިހާރު ހެދެން ފަށާފައިވާ ކަމަށް ބަގީޗާ ހައްދާ ފަަރާތްތަކާ ހަވާލަދީ ބީބީސީއިން ރިޕޯޓުކޮށްފި އެވެ.
އާދަޔާ ހިލާފަށް ހޫނުގަދަވެ، ވާރޭނުވެހި ގިނަ ދުވަސްވުމުގެ ސަބަބުން ހެދެން ފަށާފައިވާ ބައެއް ގަސްތަކުގެ ތެރޭގައި އެވޮކާޑޯ އަދި ޒައިތޫނި ގަސް ހިމެނެ އެވެ.
ބަގީޗާ ހަައްދާ ފަރާތްތަކުން ބުނީ މެޑިޓެރޭނިއަން އަދި "ސަބް ޓްރޮޕިކަލް" ހިސާބުގައި އާއްމުކޮށް ހެދޭ ގަސްތައް އިނގިރޭސިވިލާތުގައި ހެދެން ފެށީ ވަރަށް ފަހުންނެވެ.
މީގެ ކުރިން ހަމައެކަނި ގޭ ތެރޭގެ މާހައުލު ކޮންޓްރޯލްކޮށްގެން އުނދަަގުލުން ހައްދަމުން ދިޔަ ބައެއް ގަސްތައް މިހާރު ގޯތިތެރޭގެ ބަގީޗާގައި ފަސޭހަކަމާ އެކު ހެއްދެ އެވެ. އެއާ ހިލާފަށް މީގެ ކުރިން އާއްމުކޮށް އިނގިރޭސި ބަގީޗާތަކުގައި ފަސޭހައިން ހެއްދޭ ބައެއް ގަސްތައް ހެއްދުން މިހާރު އުނދަގުލެވެ.
އެހެން ނަމަވެސް ސައިންސްވެރިން ބުނީ ކުރިމަގުގައި ވާރޭވެހޭ މިންވަރު މަދުވަމުންދާ ނަމަ އަލަށް ހެދެން ފެށި ގަސްތައް އިނގިރޭސިވިލާތުގެ މާހައުލުގައި ހަރުނުލާނެ ކަމަށެވެ.
ރޯޔަލް ހޯޓިކަލްޗާ ސޮސައިޓީއިން ލަފާކުރަނީ ފިނި މޫސުމުގައި ވާރޭވެހުން އިތުރުވެ، ހޫނު މޫސުމުގައި ވާރޭވެހުން މަދުވާ ނަމަ "އެގްޒޯޓިކް" ގަސްތަކަށް އެންމެ އެކަށޭނަ މާހައުލު އުފެދޭނެ ކަމަށެވެ.
