އިނގިރޭސިވިލާތުގެ ކުރީގެ އަމީރާ ޑަޔާނާގެ ފޯޑް އެސްކޯޓް ކާރުކޮޅު އަށް ލައްކަ ޑޮލަރަށް ވިއްކާލައިފި އެވެ.
އެ ކާރު ނީލަމުގައި ވިއްކަން އާއްމު ކުރީ އިނގިރޭސިވިލާތުގެ ސިލްވަސްޓޯން އޯކްޝަންސް އިންނެވެ.
ކާރު ގަންނަން ބިޑް ކުރި މީހުންގެ ތެރޭގައި ޑުބާއީ، އެމެރިކާ އަދި އިނގިރޭސިވިލާތަށް ނިސްބަތްވާ މީހުން ހިމެނެ އެވެ.
އެންމެ މަތީ އަަގަކުން ބިޑް ކުރީ އިންގްލޭޑްގެ އެލްޑޭލީ އެޖްގައި ދިރިއުޅޭ މީހެކެވެ. އެ ތަނަކީ ޕްރިމިއާ ލީގްގެ ގިނަ ފުޓްބޯޅަ ކުޅުންތެރިން ދިރިއުޅޭ ހިސާބެކެވެ.
ކާރު ގަންނަން އެންމެ ބޮޑު އަގު ހުށަހެޅި ފަރާތުގެ ނަން ހާމަކޮށްފައެއް ނުވެ އެވެ. އެ ފަރާތުން ހުށަހެޅީ 866،000 އެމެރިކާ ޑޮލަރެވެ.
ޑަޔާނާގެ ކާރުކޮޅު ބޮޑު އަގުގައި ވިއްކާލާފައިވާ އިރު، އެކަމަނާ އަވަހާރަވިތާ 25 އަހަރު ވަރަަށް އަވަހަށް ފުރޭނެ އެވެ.
ކަޅު ކުލައިގެ ފޯޑް އެސްކޯޓް އާރްއެސް ޓާބޯ އެސް1 މޮޑެލް ކާރަކީ "ވަން އޮފް އަ ކައިންޑް" ކާރެކެވެ. ޑަޔާނާ އެދިވަޑައިގެންނެވި ގޮތަށް ފޯޑް ކުންފުނިން ކާރު ޑިޒައިން ކުރި އިރު، ރިޕޯޓުތައް ބުނާ ގޮތުން މިއީ އެ މޮޑެލްގެ ކަޅު ކުލައިގެ ހަމައެކަނި ކާރެވެ. ޑަޔާނާ އެ ކާރުކޮޅު ދުއްވީ 1985 އާއި 1988 އާ ދެމެދުގަ އެވެ.
އެ ކާރުކޮޅުގައި ވަރަށް ގިނަ ތަންތަނަށް އެކަމަނާ ވަޑައިގެންނެވި މަންޒަރު ފެންނަ ފޮޓޯތައް ނަގާފައިވެ އެވެ. އަދި ކާރުކޮޅުގެ ފަހަތުގައި ދަރިކަލުން އަމީރު ވިލިއަމް އިންނަވާ ފޮޓޯއެއް ވެސް ކުރިން އާއްމުވި އެވެ.
މިދިޔަ އަހަރު ވެސް ޑަޔާނާގެ ކާރުކޮޅެއް 61849 ޑޮލަރަށް ނީލަމުގައި ވިއްކާލި އެވެ. ރިހި ކުލައިގެ ފޯޑް އެސްކޯޓް އެ ކާރަކީ ޑަޔާނާގެ ފިރިކަލުން އަމީރު ޗާލްސް އެންގޭޖްމަންޓް ހަދިޔާއަކަށް ދެއްވި ކާރެކެވެ.
