ނިޔުކްލިއާ ހަތިޔާރު ނައްތާލުމާ ގުޅޭ ގޮތުން ކުރިއަށް ދިޔަ އދ. ގެ ބައްދަލުވުމެއްގައި ގައުމުތައް ގުޅިގެން ގަރާރެއް ފާސްކުރަން އުޅުމުން ރަޝިއާއިން އެކަމަށް ހުރަސް އަޅައިފި އެވެ.
އެ ގަރާރަކީ ނިޔުކްލިއާ ނަން ޕްރޮލިފެރޭޝަން މުއާހަދާއާ ގުޅުން ހުރި ގަރާރެކެވެ. އެ މުއާހަދާގައި ސޮއިކޮށްފައިވާ 191 ގައުމުން ކޮންމެ ފަސް އަހަރަކުން ބައްދަލުކޮށް، މުއާހަދާ މުރާޖައާ ކުރެ އެވެ.
މި ފަހަރުގެ ބައްދަލުވުމުގައި ގައުމުތަކުން ނިންމި ޑްރާފްޓުގައި ވަނީ ޔޫކްރެއިން ޒަޕޮރިއްޒިޒިއާ ނިޔުކްލިއާ ޕްލާންޓް ކައިރީގައި ހަމަލާ ބަދަލު ކުރާތީ ކަންބޮޑުވުން ފާޅުކޮށްފަ އެވެ.
މީގެ ކުރިން 2015 ވަނަ އަހަރު ވެސް މުއާހަދާގެ ބައިވެރިން ބޭއްވި ބައްދަލުވުމުގައި އެއްބަސްވުމަކަށް ނާދެވެ އެވެ. އޭގެ ފަހުން 2020 ގައި ބާއްވަން ޖެހޭ ބައްދަލުވުން 2022 އަށް ފަސްކުރީ ކޮވިޑާ ހެދި އެވެ.
ރަޝިއާއިން ގަރާރު ފާސްކުރަން ހުރަސް އެޅުމުން ގައުމުތަކުން ވަނީ ކަންބޮޑުވުން ފާޅުކޮށްފަ އެވެ. ރަޝިއާގެ މަންދޫބު އައިގޯ ވިޝްނެވެޓްސްކީ ވިދާޅުވީ ޑްރާފްޓުގައި ހަމަހަމަކަމެއް ނެތް ކަމަށެވެ.
ގަރާރު ފާސްކުރުމަށް ހަތަރު ހަފްތާގެ ބައްދަލުވުމުގައި ބައިވެރިވި ހުރިހާ ގައުމެއްގެ ރުހުން ބޭނުންވެ އެވެ. އެ ގަރާރު ގުޅިފައިވާ މުއާހަދާގައި ގައުމުތަކުން ސޮއިކުރީ 1970 ގަ އެވެ.
