ރަަޝިއާގެ ނިޔުކްލިއާ ހަކަތައާ ގުޅޭ ކުންފުނި ރޮސަތޮމްއިން ހަންގޭރީގައި އާ ދެ ނިޔުކްލިއާ ރިއެކްޓަރު ގާއިމް ކުރުމުގެ މަސައްކަތް ވަރަށް އަވަހަަށް ފަށާނެ ކަމަށް ހަންގޭރީގެ ފޮރިން މިނިސްޓަރު ވިދާޅުވެއްޖެ އެވެ.
އެއީ 2014 ވަނަ އަަހަރު ރަޝިއާ އާއި ހަންގޭރީއާ ދެމެދު ސޮއިކުރި އެއްބަސްވުމެއްގައި ހިމެނޭ ކަމެކެވެ. އޭގެ ދަށުން ހަންގޭރީގެ ޕަކްސް ނިޔުކްލިއާ ޕްލާންޓް ފުޅާކުރަން އެއްބަސްވި އެވެ.
ހަންގޭރީއަކީ އީޔޫގެ ގައުމަކަށްވާ އިރު، ޔޫކްރެއިން ހަނގުރާމައާ ގުޅިގެން އީޔޫއިން ރަޝިއާއާ ދެކޮޅަށް އެޅި ފިޔަވަޅުތަކުގެ ތެރޭގައި ރަޝިއާގެ ނިޔުކްލިއާ އިންޑަސްޓްރީއާ ގުޅޭ ފިޔަވަޅުތައް ނުހިމެނެ އެވެ.
ހަންގޭރީއަށް ބޭނުންވާ ކަރަންޓުގެ 40 ޕަސެންޓު މިހާރު ވެސް އުފައްދަނީ ޕަކްސް ނިޔުކްލިއާ ޕްލާންޓުންނެވެ. ދެ އާ ރިއެކްޓަރާ އެކު އެ ތަނުގެ ކެޕޭސިޓީ ދެ ގުނައަށް ވުރެ އިތުރު ވާނެ އެވެ. މިހާރު ވެސް އެ ޕްލާންޓްގައި ހަތަރު ރިއެކްޓަރު ހުރެ އެވެ.
ހަންގޭރީގެ ފޮރިން މިނިސްޓަރު ޕީޓާ ސްޒިޖަރްޓޯ ފޭސްބުކްގައި ކުރެއްވި ޕޯސްޓެއްގަައި ވިދާޅުވީ 2030 ވަނަ އަހަރާ ހަމައަށް ދާ އިރު ދެ އާ ރިއެކްޓަރު ބޭނުން ކުރެވޭނެ ކަމަށެވެ.
