ހދ. ނޮޅިވަރަންފަރުގައި އުނދުނުން ގޭސް ލީކުވެގެން ގެއެއްގެ ބަދިގޭގައި ރޯވެ, އެ ގޭގައި ދިރިއުޅެމުން އައި އަންހެނަކާއި އޭނާގެ ކުޑަ ދަރިފުޅަށް އަނިޔާވެ ފަރުވާ ދޭން ފަށައިފި އެވެ.
ނޮޅިވަރަންފަރު ކައުންސިލްގެ ރައީސް އަބްދުﷲ ނަދީމް މި ނޫހަށް މައުލޫމާތު ދެއްވި ގޮތުގައި، އެ ހާދިސާ އެ ރަށުގައި ހިނގައިދިޔައީ މިއަދު ހެނދުނު ހަތެއް ޖަހާކަށް ހާއިރެވެ.
"ބަދިގޭގައި ހުންނަ ގޭސް އުނދުނުން ކޮންމެ ވެސް ވަރަކަށް ލީކުވެގެން އަލިފާން ރޯވީ،" ކައުންސިލްގެ ރައީސް މައުލޫމާތު ދެއްވި އެވެ.
އެ ގޭގައި ދިރިއުޅެނީ އުމުރުން 32 އަހަރުގެ އަންހެން މީހާ އާއި އޭނާގެ ދެ އަހަރުގެ ކުޑަ ދަރިފުޅެވެ.
މަންމަ އާއި ދަރިފުޅު ވެސް އިތުރު ފަރުވާއަށް ކުޅުދުއްފުށި ސިޓީއަށް ގެންގޮސްފައިވާ ކަމަށް ނަދީމް ވިދާޅުވި އެވެ.
"މިއަދު ހެނދުނު ނުވައެއް ޖަހާކަށް ހާއިރު ކުޅުދުއްފުއްޓަށް ވަނީ ގެންގޮސްފަ، އެ ރަށު ރީޖަނަލް ހޮސްޕިޓަލުން މި ވަގުތު ފަރުވާ ދެމުން ގެންދަނީ،" ނަދީމް ވިދާޅުވި އެވެ.
ދެމައިންނަށް ލިބުނު އަނިޔާތަކުގެ ތަފްސީލެއް އަދި ނޭނގެ އެވެ. ނަދީމް ވިދާޅުވީ ދެމައިންގެ ހާލު ވެސް ރަނގަޅު ކަމަށެވެ.
އަލިފާނުގެ އެ ހާދިސާއާ ގުޅިގެން ގެއަށް މާ ބޮޑު ގެއްލުންތަކެއް ނުލިބޭ ކަމަށް ވެސް ކައުންސިލްގެ ރައީސް ވިދާޅުވި އެވެ.
ނޮޅިވަރަންފަރުގައި މިއަދު ހެނދުނު އަލިފާނުގެ ހާދިސާއެއް ހިނގިއިރު، ގދ. ރަތަފަންދޫގައި ވެސް ގޭސްފުޅިއެއް ގޮވައި އަލިފާނުގެ ހާދިސާއެއް ހަމަ މި މަހު ތެރޭ ހިނގި އެވެ. އެ ހާދިސާގައި އަނިޔާވި 53 އަަހަރުގެ އަންހެން މީހާ މާލޭގައި ފަރުވާ ދެމުން ދަނިކޮށް މި މަހު 20 ވަނަ ދުވަހު ވަނީ މަރުވެފަ އެވެ.
