އޭޝިއާގެ އެންމެ ބޮޑު މަހުޖަނު ގޯތަމް އަދަނީ އިންޑިއާގެ ނިއު ދިއްލީ ޓެލެވިޝަން ނުވަތަ އެންޑީޓީ ގަންނަން މަސައްކަތް ފަށައިފި އެވެ.
އެކަމަކު އެންޑީޓީން ބުނީ ކުންފުނީގެ މެޖޯރިޓީ ހިއްސާ ގަންނަން އަދަނީ މަސައްކަތް ފެށީ ކުންފުންޏާ އެއްވެސް މަޝްވަރާ ކުރުމެއް ނެތި ކަމަށެވެ.
އެންޑީޓީވީގެ ދަށުން ޓީވީ ޗެނަލްތަކާއި ވެބްސައިޓްތައް ހިންގަ އެވެ. އަދަނީ އެންޑީޓީވީ ގަންނަން މަސައްކަތް ފެށުމުން ސަމާލުކަން އިތުރުވީ އޭނާއަކީ ބޮޑު ވަޒީރު ނަރެންދްރަ މޯދީއާ ގާތް މީހަކަށް ވާތީ އެވެ.
އަދަނީ ގްރޫޕްގެ އޭމްޖީ މީޑިއާ ނެޓްވޯކްސް ލިމިޓެޑް (އޭއެމްއެންއެލް) އިން ނެރުނު ބަޔާނެއްގަައި ބުނީ އެންޑީޓީވީ ހިންގާ ކުންފުނި އާރްއާރްޕީއާރް ހޯލްޑިންގްގެ 29.18 ޕަސެންޓް ހިއްސާ ގަންނަން ނިންމާފައިވާ ކަމަށެވެ. އެކަމަކު ހުށަހަޅާ އަގެއް ހާމައެއް ނުކުރެ އެވެ.
އޭގެ އިތުރުން އެންޑީޓީވީގެ އިތުރު 26 ޕަސެންޓް ހިއްސާ ގަންނަން ވެސް ހުށަހަޅާނެ ކަމަށް އޭއެމްއެންއެލްގެ ބަޔާނުގައި ބުންޏެވެ. އެކަން ކާމިޔާބުވެއްޖެ ނަމަ، އެންޑީޓީވީގެ މެޖޯރިޓީ ހިއްސާ އޭއެމްއެންއެލްއަށް ލިބޭނެ އެވެ.
އަދަނީގެ މުއްސަނދިކަމުގެ އަގު 135 ބިލިއަން ޑޮލަރަށް އަރާ އިރު އޭނާއަކީ އޭޝިއާގެ އެންމެ ބޮޑު މަހުޖަނު ކަަމަށް ބްލޫމްބާގްގެ ބިލިއަނަރުންގެ އިންޑެކްސްގައިވެ އެވެ.
