ރަޝިއާގެ ނޫސްވެރިޔާ ޑާރްޔާ ޑުގީނާ މަރާލުމުގައި ޔޫކްރެއިންގެ ޖާސޫސީ އިދާރާގެ ބައިވެރިވުމެއް ނޯންނާނެ ކަމަށް ޔޫކްރެއިނުން ބުނެފި އެވެ.
ޑާރްޔާ ޑުގީނާ މަރުވީ ގެޔަށް ދަތުރު ކުރަމުން ދަނިކޮށް ކާރު ގޮވައިގެންނެވެ. ބެލެވެނީ ހަމަލާގެ އަސްލު އަމާޒަކީ އޭނާގެ ބައްޕަ، ފިލޯސޮފަރު އެލެގްޒެންޑާ ޑުގިން ކަމަށެވެ.
ޑުގިންއަކީ "ޕުޓިންގެ ސިކުނޑި" ނަމުގައި މަޝްހޫރުވެފައިވާ މީހެކެވެ. ޑުގިން އާއި ޑާރްޔާއަށް ހާއްސަ ފެސްޓިވަލެއްގައި ބައިވެރިވުމުގެ ދައުވަތު ލިބި، ޑުގިން އެ ތަނުގައި ވާހަކަ ވެސް ދެއްކި އެވެ.
"ޓްރެޑިޝަން" ފެސްޓިވަލް ނިންމާލުމަށް ފަހު، ޑުގިން އާއި ޑާރްޔާ އެއް ކާރެއްގައި ދަތުރު ކުރަން ހަމަޖެހިފައި އޮތް ނަމަވެސް، އެންމެ ފަހު ވަގުތު ޑުގިން ދަތުރު ކުރީ އެހެން ކާރެއްގަ އެވެ.
"މިއީ އަހަރުމެން މަސައްކަތް ކުރާ ގޮތެއް ނޫން،" ޔޫކްރެއިންގެ ނޭޝަނަލް ސެކިއުރިޓީ އަދި ޑިފެންސް ކައުންސިލްގެ ސެކެޓްރީ އޮލެކްސީ ޑެނިލޯވް ވިދާޅުވި އެވެ.
"އަޅުގަނޑުމެންގެ އަންހެނުންނާއި ފިރިހެނުންނަށް މިއަށް ވުރެ މާ މުހިއްމު ކަންކަން ކުރަން އެބަހުރި. މިކަން ކުރީ އެފްއެސްބީއިން. މިހާރު އަޅުގަނޑުމެންނަށް އެ އިނގިލި ދިއްކުރަނީ."
އުމުރުން 29 އަހަަރުގެ ޑާރްޔާގެ ހަނދާނުގައި މޮސްކޯގައި ހާއްސަ ހަފްލާއެއް އަންގާރަ ދުވަހު އޮތެވެ. ރައީސް ޕުޓިން ވަނީ ހަމަލާ ކުށްވެރި ކުރައްވައި ޑާރްޔާއަށް "އޯޑާ އޮފް ކަރެޖް" އެވޯޑް އަރުވާފަ އެވެ.
ރަޝިއާގެ ފެޑެރަލް ސެކިއުރިޓީ ސާވިސް (އެފްއެސްބީ) އިން ހޯމަ ދުވަހު ބުނީ ތަހުގީގު ނިމިއްޖެ ކަމަށާއި ހަމަލާގެ ސީދާ ޒިންމާާ ނަގަން ޖެހެނީ ޔޫކްރެއިނުން ކަމަށެވެ.
އެފްއެސްބީއިން ބުނީ ޔޫކްރެއިންގެ އަންހެނަކާއި އޭނާގެ ދަރިއަކު ރަޝިއާއަށް ދިރިއުޅުން ބަދަލު ކުރީ މިދިޔަ ޖުލައި މަހުގައި ކަމަށާއި އެއީ ޔޫކްރެއިންގެ ޖާސޫސީ އިދާރާގެ ހާއްސަ އޭޖެންޓެއް ކަމަށެވެ.
ޑާރްޔާ ދިރިއުޅުނު އިމާރާތުގެ އެޕާޓްމަންޓެއްގައި އެ އަންހެން މީހާ މަހެއް ވަންދެން ދިރިއުޅުނު ކަމަށާއި އެ މުއްދަތުގައި ހަމަލާ ރޭވި ކަމަށް އެފްއެސްބީއިން ބުންޏެވެ.
ކާރު ގޮއްވާލުމަށް ފަހު، އޭނާ ވަނީ ރަޝިއާ ދޫކޮށް އެސްޓޯނިއާއަށް ފިލާފައި ކަމަށް ވެސް އެފްއެސްބީއިން ބުންޏެވެ. އެކަމަކު ޔޫކްރެއިނުން ބުނީ އެ ވާހަކަތަކަކީ ރަޝިއާގެ ޕްރޮޕެގެންޑާ ކަމަށެވެ.
ޑާރްޔާއަކީ ޔޫކްރެއިން ހަނގުރާމައަށް ތާއީދު ކުރި ނޫސްވެރިއެކެވެ. އެމެރިކާ އާއި އިނގިރޭސިވިލާތުން ފިޔަަވަޅު އެޅި މީހުންގެ ލިސްޓުގައި އުމުރުން 30 އަހަރުގެ ޑާރްޔާ ހިމެނެ އެވެ.
