ދިރާސާތައް ކުރުމަށް ހާއްސަ ޗައިނާގެ ބޯޓު ޔުއާން ވާންގް 5 ސްރީ ލަންކާގެ ހަމްބަންޓޯޓާ ބަނދަރުން ހޯމަ ދުވަހު ފުރައިފި އެވެ.
ޔުއާން ވާންގް 5 ބޯޓަކީ ދިރާސާ ކުރުމަށް ހާއްސަ ބޯޓެއް ނަމަވެސް އިންޑިއާގެ ނޫސްތަކުން ރިޕޯޓު ކުރާ ގޮތުގައި ޗައިނާގެ ޖާސޫސީ މަސައްކަތް ވެސް އެ ބޯޓުން ކުރެ އެވެ.
ކުރިން ހަމަޖެހިފައި އޮތީ އޯގަސްޓް 11 ވަނަ ދުވަހު އެ ބޯޓު ހަމްބަންޓޯޓާ ބަނދަރަށް ވަނުމަށެވެ. އެކަމަކު، އިންޑިއާގެ ޕްރެޝަރާ ހެދި ދަތުރު ފަސްކޮށްދޭން ލަންކާއިން އެދުނެވެ.
އެހެން ނަމަވެސް ލަންކާ ފޮރިން މިނިސްޓްރީން ވަނީ މިދިޔަ އަންގާރަ ދުވަހުން ފެށިގެން ހަމްބަންޓޯޓާގައި ހަ ދުވަސް ވަންދެން ބޯޓު ބަނދަރުކޮށްގެން އޮތުމަށް ހުއްދަ ދީފަ އެވެ.
ސްރީލަންކާ ސަރުކާރާއި ޗައިނާ މާޗަންޓްސް ޕޯޓް ހޯލްޑިންގްސް ޕާޓްނާޝިޕް ކުންފުނި ހަމްބަންޓޯޓާ އިންޓަނޭޝަނަލް ޕޯޓް ގްރޫޕުން ބުނީ އެ ބޯޓު ލަަންކާއިން ފުރީ ހަފްތާއެއް ފަހުން ހޯމަ ދުވަަހު ކަމަށެވެ.
ބޯޓު ދެން ދަތުރު ކުރާނީ ކޮން މަންޒިލަކަށް ކަމެއް ނޭނގެ އެވެ. އެ ބޯޓު އުފެއްދީ 2007 ވަނަ އަހަރުގަ އެވެ. އެ ބޯޓަށް 11،000 ޓަނުގެ ތަކެތި އުފުލުމުގެ ގާބިލްކަން ލިބިފައިވެ އެވެ.
ސްރީ ލަންކާގެ އެކްސްލޫސިވް އިކޮނޮމިކް ޒޯންގެ ތެރޭގަައި ބޯޓު އޮންނަ އިރު އޭގެ އޮޓޯމެޓިކް އައިޑެންޓިފިކޭޝަން ސިސްޓަމް (އޭއައިސް) ޖައްސާފައި ބަހައްޓަން ލަންކާ ސަރުކާރުން އެންގި އެވެ.
އޭގެ އިތުރުން ލަންކާގެ ކަނޑުގެ އެއްވެސް ސަރަހައްދެއްގައި ސައިންސްގެ ދިރާސާއެއް އަދި ތަހުލީލެއް ހިންގުމުގެ ހުއްދަ ބޯޓަށް ދީފައެއް ނުވެ އެވެ.
ޗައިނާއިން ލަންކާގައި ބިނާކޮށް، ހިންގަމުންދާ ހަމްބަންޓޯޓާ ބަނދަަރަކީ އަަސްކަރީ ބަނދަރެއްގެ ގޮތުގައި ބޭނުންކޮށްފާނެތީ އިންޑިއާއިން ކަންބޮޑުވެ އެވެ. ޖުމުލަ 1.5 ބިލިއަން ޑޮލަރު ހޭދަކޮށްގެން ހެދި އެ ބަނދަރަކީ އޭޝިއާ އާއި ޔޫރަޕާ ދެމެދުގަައިވާ މައި ޝިޕިން ރޫޓް ކަައިރީގައި އޮންނަ ބަނދަރެކެވެ.
ފޮރިން ސެކިއުރިޓީ އެނެލިސްޓުން ބުނާ ގޮތުގައި "ޔުއާން ވާންގް 5" މަނަވަރަކީ ޗައިނާގެ އެންމެ ފަހުގެ ސްޕޭސް ޓްރެކިން މަނަވަރެކެވެ. އެ މަނަވަރުން ސެޓެލައިޓާއި، ރޮކެޓް އަދި އިންޓަަކޮންޓިނެންޓަލް ބެލިސްޓިކް މިސައިލްތަައް މޮނީޓާ ކުރެވޭނެ އެވެ.
ސްރީ ލަންކާގެ ބެލްޓް އެންޑް ރޯޑް އިނީޝިއޭޓިވް ކުންފުނިން ބުނީ ޔުއާން ވާންގް 5 މަނަވަރު ހަމްބަންޓޯޓާ ބަަނދަރުގައި ހަފްތާއެއް ވަންދެން އޮންނާނެ ކަމަށާއި އެ ދަތުރުގައި "ޖައްވު ޓްރެކް ކުރުމާއި، ސެޓެލައިޓް ކޮންޓްރޯލް ކުރުން" ކުރިއަށް ގެންދާނީ އިންޑިއާ ކަަނޑުގެ ހުޅަނގު އުތުރުގައި ކަމަށެވެ.
ލަަންކާގެ އެންމެ ދެކުނުގައި އޮންނަ ހަމްބަންޓޯޓާ ބަނދަރު ހިންގުން 2017 ވަނަ އަހަރު ޗަައިނާގެ ކުންފުންޏަކާ ހަވާލު ކުރީ، އެ ތަން ހެދުމަަށް ނެގި ލޯނު ނުދެއްކޭތީ 99 އަހަރުގެ މުއްދަތަކަަށެވެ. މީގެ ކުރިން 2014 ވަނަ އަހަރު ވެސް ޗައިނާގެ ސަބްމެރީނެއް އަދި ހަނގުރާމަ މަތީ މަނަވަރެއް ކޮލޮމްބޯ ބަނދަރާ ކައިރިވުމަށް ހުއްދަ ދިނުމުން އިންޑިއާއިން ހިތްހަމަނުޖެހުނެވެ.
