އަލްބޭނިއާގެ އަސްކަރީ ޕްލާންޓަކަށް ދިން ހަމަލާއަކާ ގުޅިގެން ރަޝިއާގެ ޖާސޫސުން ކަމަށް ތުހުމަތު ކުރެވޭ ތިން މީހަކު ހައްޔަރުކޮށްފި އެވެ.
ހައްޔަރު ކުރީ ރަޝިއާ ދެ މީހުންނާއި ޔޫކްރެއިން މީހެކެވެ. އެ މީހުން ކެމިކަލް ބޭނުންކޮށް ދިން ހަމަލާގައި އަސްކަރީ ޕްލާންޓުގެ ދެ ގާޑުންނަށް އަނިޔާވި އެވެ.
ހައްޔަރު ކުރި އުމުރުން 24 އަހަަރުގެ ފިރިހެނަކު އަސްކަރީ ޕްލާންޓް ވަށައިގެންވާ ހިސާބުގެ ފޮޓޯ ނަގަން އުޅެނިކޮށް ބައެއް މީހުންނަށް ފެނިފައިވެ އެވެ.
"އެ ތަނުން އެކަކު ގާޑުންނަށް ހަމަލާ ދީ، ސްޕްރޭއެއް ޖެހި. އެހެން ނަަމަވެސް ގާޑުން ވަނީ އަވަހަށް ފުލުހުންގެ ސަމާލުކަމަށް އެ ހާދިސާ ގެނެސްފައި،" ޑިފެންސް މިނިސްޓަރު ނީކޯ ޕެލެޝީ ވިދާޅުވި އެވެ.
ތުހުމަތު ކުރެވޭ އަނެއް ދެ މީހުން ހައްޔަަރު ކުރީ އަސްކަރީ ޕްލާންޓް ކައިރީގައި ކާރެއްގައި މަޑުކޮށްގެން ތިއްބަ އެވެ. އަލްބޭނިއާގެ ބޮޑު ވަޒީރު އެޑީ ރާމާ ވިދާޅުވީ ޖާސޫސް ކުރުމުގެ ތުހުމަތު ތިން މީހަކަށް ވެސް ކުރެވޭ ކަމަށެވެ.
މީގެ ކުރިން ވެސް ރަޝިއާގެ ޖާސޫސުން ކަމަށް ބެލެވޭ މީހުން އަލްބޭނިއާގެ ސިއްރު މައުލޫމާތު ހޯދަން އުޅެފަައިވެ އެވެ. އަލްބޭނިއާއަކީ 2009 އިން ފެށިގެން ނޭޓޯގެ މެމްބަރެކެވެ.
މިދިޔަ އަހަރު ކުކޯވާ ވައިގެ މަރުކަޒު ވަށައިގެންވާ ހިސާބުގައި ޑްރޯންއެއް ހިފައިގެން އުޅުނު ރަޝިއާގެ ދެ މީހަކު ހައްޔަރު ކުރި އެވެ.
ރަޝިއާ މީހުން އާއްމުކޮށް އަލްބޭނިއާއަށް އެތެރެ ވަނީ ފަތުރުވެރިންގެ ގޮތުގަ އެވެ. ހޫނު މޫސުމާ ދިމާކޮށް ރަޝިއާ ފަތުރުވެރިންނަށް ވިސާ ނެތި އަލްބޭނިއާ އަށް އެތެރެވެވެ އެވެ.
އެހެން ނަމަވެސް، ޖާސޫސް ކުރުމުގެ މައްސަލަތައް އިތުރުވަމުން ދާތީ، އެ އުސޫލު އުވާލުމަށް މިހާރު ބައެއް ފަރާތްތަކުން ދަނީ ގޮވާލަމުންނެވެ.
