މޮސްކޯގެ ހައިވޭއެއް ކައިރީގައި ދިން ބޮމުގެ ހަމަލާއެއްގައި ރަޝިއާގެ ރަައީސް ލެޑިމިއަ ޕުޓިންއާ ގާތް މީހެއްގެ އަންހެން ދަރިއަކު މަރުވެއްޖެ އެވެ.
ޑާރްޔާ ޑުގީނާ މަރުވީ ގެޔަށް ދަތުރު ކުރަމުން ދަނިކޮށް ކާރު ގޮވައިގެންނެވެ. ބެލެވެނީ ހަމަލާގެ އަސްލު އަމާޒަކީ އޭނާގެ ބައްޕަ، ފިލޯސޮފަރު އެލެގްޒެންޑާ ޑުގިން ކަމަށެވެ.
ޑުގިންއަކީ "ޕުޓިންގެ ސިކުނޑި" ނަމުގައި މަޝްހޫރުވެފައިވާ މީހެކެވެ. ޑުގިން އާއި ޑާރްޔާއަށް ހާއްސަ ފެސްޓިވަލެއްގައި ބައިވެރިވުމުގެ ދައުވަތު ލިބި، ޑުގިން އެ ތަނުގައި ވާހަކަ ވެސް ދެއްކި އެވެ.
އެލެގްޒެންޑާ ޑުގިން.
"ޓްރެޑިޝަން" ފެސްޓިވަލް ނިންމާލުމަށް ފަހު، ޑުގިން އާއި ޑާރްޔާ އެއް ކާރެއްގައި ދަތުރު ކުރަން ހަމަޖެހިފައި އޮތް ނަމަވެސް، އެންމެ ފަހު ވަގުތު ޑުގިން ދަތުރު ކުރީ އެހެން ކާރެއްގަ އެވެ.
ސަރުކާރުގައި ރަސްމީ އެއްވެއް މަގާމެއް ނުފުރި ނަމަވެސް، ޑުގިންއަކީ ޕުޓިންގެ އެންމެ ގާތް މީހުންގެ ތެރޭގައި ހިމެނޭ މީހެކެވެ.
އޭނާގެ ދަރިފުޅު ޑާރްޔާއަކީ ޔޫކްރެއިން ހަނގުރާމައަށް ތާއީދު ކުރި ނޫސްވެރިއެކެވެ. އެމެރިކާ އާއި އިނގިރޭސިވިލާތުން ފިޔަަވަޅު އެޅި މީހުންގެ ލިސްޓުގައި އުމުރުން 30 އަހަރުގެ ޑާރްޔާ ހިމެނެ އެވެ.
