ކްރައިމިއާގައި ހުންނަ ރަޝިއާގެ އަސްކަރީ މަރުކަޒަކަށް އަަމާޒުކޮށް ޑްރޯން ހަމަލާތަކެއް ދީފި އެވެ.
އެ ސަރަހައްދަށް ރަޝިއާއިން ކަނޑައަޅާފައި ހުންނަ ވެރިޔާ ވިދާޅުވީ ޑްރޯން ހަމަލާ ދިނީ ބްލެކް ސީއަށް ހާއްސަ ހަަނގުރާމަ މަތީ ބޯޓުތަކުގެ މައި އޮފީހަށް ކަމަށެވެ. ސެވަސްޓޮޕޯލް ސިޓީގައި ހުންނަ އެ އޮފީހަށް ހަމަލާ ދިން ޔޫކްރެއިން ޑްރޯން ވައްޓާލާފައިވާ ކަމަށް އޭނާ ވިދާޅުވި އެވެ.
"އެ ޑްރޯން ވެއްޓުނީ އޮފީހުގެ ފުރާޅަށް. މާ ބޮޑު ގެއްލުމެއް ނުވޭ. އެއްވެސް މީހަކަށް އަނިޔާއެއް ވެސް ނުވޭ،" އޭނާ ވިދާޅުވި އެވެ.
އެހެން ނަމަވެސް ހަމަލާއަށް ފަހު އެ ހިސާބުން ދުން އަރާ މަންޒަރު ފެންނަ ވީޑިއޯއެއް ވަނީ އާއްމުވެފަ އެވެ. ފަހަކަށް އައިސް ކްރައިމިއާގައި ހުންނަ ރަޝިއާގެ އަސްކަަރީ މަރުކަޒުތަކަށް ހަމަލާތައް ދަނީ އަމާޒުވަމުންނެވެ.
މިދިޔަ ހަފުތާގައި ކްރައިމިއާގައި ހުންނަ ރަޝިއާގެ އަސްކަަރީ މަރުކަޒެއްގައި ގޮވުމެއް ގޮވައި އެކަކު މަރުވި އެވެ. އެ ތަނުގައި ގޮވީ ގުދަންކޮށްފައި ހުރި ބޮން ފަދަ ތަކެއްޗެވެ.
އޭގެ އިތުރުން މިދިޔަ ހަފުތާގައި ކްރައިމިއާގެ އައްސޭރި ފަށުގައި ރަޝިއާގެ ހަަނގުރާމަ މަތީ ޖެޓުތަކަކަށް ހަމަލާދިނެވެ. ރަޝިއާއިން ބުނީ އެއީ އޮޅުމަކުން ހިނގި ކަމެއް ކަަމަަށެވެ.
ޔޫކްރެއިނުން ވެސް ވަކި އެއްޗެއް ބުނެފައިވާ އިރު، ސެޓެލައިޓް އިމޭޖްތައް ބެލި އެނެލިސްޓުން ބުނީ ބޮޑަށް ބެލެވެނީ އެއީ ޓާގެޓްކޮށްގެން ޔޫކްރެއިނުން ދިން ހަމަލާއެއް ކަމަށެވެ.
އޭގެ އިތުރުން ކްރައިމިއާގެ ޒަންކޮއި ހިސާބުގައި ހުންނަ އަސްކަަރީ މަރުކަޒެއްގެ ހަތިޔާރު ރައްކާ ކުރާ ގުދަނުގައި ގޮވުންތަކެއް ގޮވައި ދެ މީހުންނަށް އަނިޔާވި އެވެ.
ކްރައިމިއާއަކީ ރަޝިއާއިން 2014 ވަނަ އަހަރު ހިފި ޔޫކްރެއިންގެ ސަރަހައްދެކެވެ. އެއީ ރަޝިއާގެ ފަތުރުވެރިންގެ މެދުގައި މަގްބޫލް މަންޒިލެކެވެ.
ޔޫކްރެއިންގައި ކުރާ ހަނގުރާމަ ފެށުނީ ކްރައިމިއާއިން ކަމަށާއި ހަނގުރާމަ ނިމޭނީ އެތަން މިނިވަންވުމުން ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ މިދިޔަ ހަފްތާގައި ވިދާޅުވި އެވެ.
