ޔޫކްރެއިންގެ ޒަޕޮރިއްޒިޒިއާ ނިޔުކްލިއާ ޕްލާންޓް އިންސްޕެކްޓް ކުރުމުގެ ފުރުސަތު އދ. ގެ އޮފިޝަލުންނަށް ފޯރުކޮށްދޭނެ ކަމަށް ރަޝިއާގެ ރައީސް ލެޑިމިއަ ޕުޓިން ވިދާޅުވެއްޖެ އެވެ.
ރަޝިއާއިން އެކަން އިއުލާން ކުރީ ޕުޓިން އާއި ފްރާންސްގެ ރައީސް އިމޭނުއެލް މެކްރޯން ފޯނުން ކުރެއްވި މަޝްވަރާއަށް ފަހުގަ އެވެ.
ނިޔުކްލިއާ ޕްލާންޓް ކައިރީގައި ހަމަލާ ބަދަލު ކުރުން އިތުރުވެ، ރަޝިއާގެ ހަމަލާއެއްގެ ސަބަބުން ހަތަރު މީހުންނަށް އަނިޔާވެފައިވާ ކަމަށް ބައެއް ރިޕޯޓުތަައް ބުނެ އެވެ.
ރަޝިއާއިން އެ ޕްލާންޓް ހިފީ މިދިޔަ މާޗް މަހުގަ އެވެ. އެ ތަނުގެ ސެކިއުރިޓީ ބަލަހައްޓަނީ ރަޝިއާ ސިފައިން ނަމަވެސް މުވައްޒަފުންނަކީ ޔޫކްރެއިން ރައްޔިތުންނެވެ.
އިންޓަނޭޝަނަލް އެޓޮމިކް އެނާޖީ އެޖެންސީ (އައިއޭއީއޭ) ގެ ޑިރެކްޓަރު ޖެނެރަލް ރަފައެލް ގްރޮސީ ވަނީ ރަޝިއާގެ ނިންމުމަށް މަރުހަބާ ދަންނަވައިފަ އެވެ.
ޔޫކްރެއިންގެ ރައީސް ވޮލޮޑިމިރް ޒެލެންސްކީ ވެސް ވިދާޅުވީ އައިއޭއީއޭގެ އޮފިޝަލުންނަށް ޕްލާންޓް އިންސްޕްކެޓް ކުރުމުގެ ފުރުސަތު ދިނުމަށް މަރުހަބާ ކިޔާ ކަމަށެވެ.
ރަޝިއާއިން އުޅެނީ އެ ޕްލާންޓް އަސްކަރީ މަރުކަޒަކަަށް ބަދަލުކޮށް ނިޔުކްލިއާ ބްލެކްމެއިލް ކުރުމުގެ ބޭނުމުގައި ކަމަށް ޒެލެންސްކީ ތުހުމަތު ކުރެއްވި އެވެ.
އެ ޕްލާންޓަށް އަމާޒުކޮށް ހަމަލާދޭ މައްސަލައިގައި ކަންބޮޑުވުން އިތުރުވެފައިވާ އިރު، އެކަމުގެ ޒިންމާ ރަަޝިއާ އަދި ޔޫކްރެއިނުން ވެސް ނުއުފުލަ އެވެ.
