ކުރީ ސަރުކާރުން ތައުލީމީ ދާއިރާއަށް ހިންގި މަޝްރޫއުތަކަށްވުރެ މި ސަރުކާރުން ހިންގި މަޝްތޫއުތައް އެތައް ގުނައެއް އިތުރު ކަމަށް އެޑިޔުކޭޝަން މިނިސްޓަރު އައިޝަރު އަލީ ވިދާޅުވެއްޖެ އެވެ.
އެމްޑީޕީން ރޭ ފެށި އެ ޕާޓީގެ ކޮންގްރެސް މިއަދަށް ފެށުމުގެ ގޮތުން މިހާރު ކުރިއަށްދާ ޖަލްސާގައި ވާހަކަ ދައްކަވަމުން މިނިސްޓަރު ވިދާޅުވީ ތައުލީމީ ދާއިރާ ކުރިއަރުވަން އެންމެ ބޮޑު ހަރަދެއް ކުރި ސަރުކާރަކީ މި ސަރުކާރު ކަމަށެވެ.
އަދި މިއީ ތައުލީމީ ދާއިރާއަށް އެންމެ ގިނަ މަޝްރޫއުތައް ހިންގި ސަރުކާރު ކަމަށް ވެސް މިނިސްޓަރު ވިދާޅުވި އެވެ.
ކުރީ ސަރުކާރުގެ މަޝްރޫއުތައް
- މަސައްކަތް ފުރިހަމަ ކޮށްފައި ވަނީ 135 ކްލާސްރުމު
- މިދިޔަ ދައުރުގައި އެޅުނީ 15 މަލްޓިޕާޕޯޒް ހޯލު
- 2014 އިން 2018 އަށް ކުރިއަށް ގެންދިޔަ އެހެނިހެން މަޝްރޫއުގެ ތެރޭގައި ހިމެނެނީ 64 މަޝްރޫއުއެއް
މި ސަރުކާރުން މިހާތަނަށް ހިންގާ މަޝްރޫއުތައް
- މި ސަރުކާރުން މި ވީ ހަތަރު އަހަރުގެ ތެރޭގައި 1،288 ކްލާސްރޫމުގެ މަސައްކަތް ކުރިއަށްދޭ
- މި ސަރުކާރުން 81 މަލްޓިޕާޕޯޒް ހޯލުގެ މަސައްކަތް ކުރިއަށްދޭ
- މި ސަރުކާރުން މިހާތަނަށް ދަނީ 338 މަޝްރޫއު ކުރިއަށް ގެންދަމުން
ސަރުކާރުން ހިންގާ މަޝްރޫއުތައް، ޕީއެސްއައިޕީގެ ބަޖެޓުން 2014 އިން 2018އަށް ކުރިއަށް ގެންދިޔަ މަޝްރޫއުތަކަށް ޖުމްލަ ހަރަދުކޮށްފައި ވަނީ 941.6 މިލިއަން ރުފިޔާ ކަމަށާއި މި ސަރުކާރުން މިވީ ހަތަރު އަހަރު ތެރޭގައި 1316.9 މިލިއަން ރުފިޔާ ހަރަދުކޮށްފައިވާ ކަމަށް މިނިސްޓަރު ވިދާޅުވި އެވެ.
މީގެ އިތުރުން މިނިސްޓަރު ވަނީ އެއްދަންފަޅިއަށް ހެދުމުގެ ވައުދު ފުއްދުމަށްޓަކައި ހިންގަމުންދާ މަޝްރޫއުތަކަށް ވެސް އަލިއަޅުއްވާލައްވާފަ އެވެ. އޭގެ ތެރެއިން 44 މަޝްރޫއުއެއް މިހާރު ނިމި މިހާރު ބޭނުން ކުރަމުންދާ ކަމަށް މިނިސްޓަރު ވިދާޅުވި އެވެ.
ކުދި ރަަށްރަށުގައި ތިބޭ މަދު ކުދިން އެއް ރަށުން އަނެއް ރަށަށް ތައުލީމު ހާސިލް ކުރުމަށް ކަނޑު ހުރަސްކުރަން ޖެހޭ މައްސަލައަށް ވެސް މި ސަރުކާރުން ނިމުމެއް ގެނެސް "ސެޓްލައިޓު ސްކޫލު" އެ ރަށްރަށުގައި ގާއިމް ކޮށްދީފައިވެ އެވެ.
އެކަމަށް އަލި އަޅުއްވާލައްވާ މިނިސްޓަރު ވިދާޅުވީ "އަމިއްލަ ރަށުގައި ތިބެގެން ފެންވަރު ރަނގަޅު ތައުލީމެއް މިހާރު ވަނީ ގާއިމް ކޮށްދީފައި. ސެޓްލައިޓް ނިޒާމު މެދުވެރިކޮށް ކިޔެވުން ވަނީ ފަހިކޮށްދީފައި،" ކަމަށެވެ.
މީގެ އިތުރުން ބ. ފުޅަދޫ، ގދ. ކޮނޑޭ އަދި އދ. ދިއްދޫގެ ބެލެނިވެރިންގެ އެންމެ ބޮޑު އެއް ކަންބޮޑުވުމަށް ވެސް ހައްލެއް ގެނެސްފައިވާ ކަމަށް މިނިސްޓަރު ވިދާޅުވީ އެ ރަށްރަށުގައި ސެޓްލައިޓް ސްކޫލު މެދުވެރިކޮށް ގްރޭޑް 9 ކިޔަވަައިދޭން މި އަހަރު ފަށާފައިވާ ކަމަށެވެ.
