ރަޝިއާއިން ހިފައިގެން އުޅޭ ކްރައިމިއާގެ އަސްކަރީ މަރުކަޒެއްގައި އަނެއްކާވެސް ގޮވުންތަކެއް ގޮވައި ދެ މީހުންނަށް އަަނިޔާވެއްޖެ އެވެ.
އޮފިޝަލުން ބުނީ އުތުރު ކްރައިމިއާގެ ޒަންކޮއި ހިސާބުގައި ހުންނަ މަރުކަޒުގެ ހަތިޔާރު ރައްކާ ކުރާ ގުދަނުގައި ގޮވުންތަކެއް ގޮވީ އަލިފާން ރޯވެގެން ކަމަށެވެ.
މިދިޔަ ހަފްތާގައި ވެސް ކްރައިމިއާގައި ހުންނަ ރަޝިއާގެ އަސްކަަރީ މަރުކަޒެއްގައި ގޮވުމެއް ގޮވައި އެކަކު މަރުވި އެވެ. އެ ތަނުގައި ވެސް ގޮވީ ގުދަންކޮށްފައި ހުރި ބޮން ފަދަ ތަކެއްޗެވެ.
އޭގެ އިތުރުން މިދިޔަ ހަފްތާގައި ކްރައިމިއާގެ އައްސޭރި ފަށުގައި ރަޝިއާގެ ހަަނގުރާމަ މަތީ ޖެޓުތަކަކަށް ހަމަލާދިނެވެ. ރަޝިއާއިން ބުނީ އެއީ ވެސް އޮޅުމަކުން ހިނގި ކަމެއް ކަަމަަށެވެ.
ޔޫކްރެއިނުން ވެސް ވަކި އެއްޗެއް ބުނެފައިވާ އިރު، ސެޓެލައިޓް އިމޭޖްތައް ބެލި އެނެލިސްޓުން ބުނީ ބޮޑަށް ބެލެވެނީ އެއީ ޓާގެޓްކޮށްގެން ޔޫކްރެއިނުން ދިން ހަމަލާއެއް ކަމަށެވެ.
ކްރައިމިއާއަކީ ރަޝިއާއިން 2014 ވަނަ އަހަރު ހިފި ޔޫކްރެއިންގެ ސަރަހައްދެކެވެ. އެއީ ރަޝިއާގެ ފަތުރުވެރިންގެ މެދުގައި މަގްބޫލް މަންޒިލެކެވެ.
ޔޫކްރެއިންގައި ކުރާ ހަނގުރާމަ ފެށުނީ ކްރައިމިއާއިން ކަމަށާއި ހަނގުރާމަ ނިމޭނީ އެތަން މިނިވަންވުމުން ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ މިދިޔަ ހަފްތާގައި ވިދާޅުވި އެވެ.
