އިންޑިއާ ސަރުކާރުން ސްރީ ލަންކާއަަށް ހަދިޔާ ކުރި ޑޯނިއާ މަތިންދާ ބޯޓު ހޯމަ ދުވަހު ރަސްމީކޮށް ހަވާލުކޮށްފި އެވެ.
އެ މަތިންދާ ބޯޓު ބޮޑު ވަޒީރު ރަނިލް ވިކްރަަމަސިންހައާ ހަވާލު ކުރެއްވީ އިންޑިއާގެ ހައި ކޮމިޝަަނަރު ގޯޕާާލް ބަގްލޭ އެވެ. އެކަމަށް ހާއްސަ ރަސްމިއްޔާތު އޮތީ ބަންޑާރަނައިކެ އެއާާޕޯޓުގަ އެވެ.
އިންޑިއާގެ ހައި ކޮމިޝަނުން ބުނީ އާ ވައިގެ އުޅަނދާ އެކު ސްރީލަންކާގެ އެއާފޯސް ހަރުދަނާވެ، އެ ގައުމުގެ ސެކިއުރިޓީ ވަރުގަދަ ކުރެވޭނެ ކަމަށެވެ.
އެ ވައިގެ އުޅަނދަކީ ސްރީލަންކާގެ ކަަނޑުގެ ސަރަހައްދު ޕެޓްރޯލް ކުރުމަށް މުހިއްމު ވަސީލަތެއްގެ ގޮތުގައި ވެސް ހައި ކޮމިޝަނުން ފާާހަގަކުރި އެވެ.
"މިއީ އިންޑިއާގެ ބާރު، އެކުވެރިންނާއި ރަހުމަތްތެރިންނާ ހިއްސާ ކުރުމުގެ މިސާލެއް،" އިންޑިއާގެ ހައި ކޮމިޝަނުން ބުންޏެވެ.
އިންޑިއާގެ ޑޯނިއާ އެއާކްރާފްޓެއް ލަންކާ ހަދިޔާކޮށްފައިވާ އިރު، ޗަައިނާގެ ބޯޓެއް ލަންކާގައި ބަނދަރު ކުރަން އުޅޭ މައްސަލައިގައި އިންޑިއާއިން ލަންކާއަށް ޝަަކުވާ ހުށަހެޅި އެވެ.
އެ ޕްރެޝަރާ ހެދި ބޯޓުގެ ދަތުރު ފަސްކޮށްދޭން އެދުނު ނަމަވެސް، މިހާރު ލަންކާއިން ވަނީ އެ ބޯޓު އަންގާރަ ދުވަހު ހަމްބަންޓޯޓާގައި ބަނދަރު ކުރުމަށް ހުއްދަ ދީފަ އެވެ.
ޔުއާން ވާންގް 5 ބޯޓަކީ ދިރާސާ ކުރުމަށް ހާއްސަ ބޯޓެއް ނަމަވެސް އިންޑިއާގެ ނޫސްތަކުން ރިޕޯޓު ކުރާ ގޮތުގައި ޗައިނާގެ ޖާސޫސީ މަސައްކަތް ވެސް އެ ބޯޓުން ކުރެ އެވެ.
