ކޮލޮމްބޯ، ސްރީ ލަންކާ (އޯގަސްޓް 13) - އިންޑިއާއިން ކަންބޮޑުވުން ފާޅު ކުރި ނަމަވެސް، ޗައިނާގެ މަނަވަރު ސްރީ ލަންކާގެ ބަނދަރާ ކައިރި ކުރަން ހުއްދަ ދީފި އެވެ.
ޔުއާން ވާންގް 5 ބޯޓަކީ ދިރާސާ ކުރުމަށް ހާއްސަ ބޯޓެއް ނަމަވެސް އިންޑިއާގެ ނޫސްތަކުން ރިޕޯޓު ކުރާ ގޮތުގައި ޗައިނާގެ ޖާސޫސީ މަސައްކަތް ވެސް އެ ބޯޓުން ކުރެ އެވެ.
ކުރިން ހަމަޖެހިފައި އޮތީ މިދިޔަ ބުރާސްފަތި ދުވަހު އެ ބޯޓު ހަމްބަންޓޯޓާ ބަނދަރަށް ވަނުމަށެވެ. އެކަމަކު، އިންޑިއާގެ ޕްރެޝަރާ ހެދި ދަތުރު ފަސްކޮށްދޭން ލަންކާއިން އެދުނެވެ.
އެހެން ނަމަވެސް ލަންކާ ފޮރިން މިނިސްޓްރީން ބުނީ އެ ބޯޓު އަންނަ އަންގާރަ ދުވަހުން ފެށިގެން ހަމްބަންޓޯޓާގައި ހަ ދުވަސް ވަންދެން ބަނދަރުކޮށްގެން އޮތުމަށް ހުއްދަ ދީފައިވާ ކަމަށެވެ.
ސްރީ ލަންކާގެ އެކްސްލޫސިވް އިކޮނޮމިކް ޒޯންގެ ތެރޭގަައި ބޯޓު އޮންނަ އިރު އޭގެ އޮޓޯމެޓިކް އައިޑެންޓިފިކޭޝަން ސިސްޓަމް (އޭއައިސް) ޖައްސާފައި ބަހައްޓަން ވަނީ އަންގައިފަ އެވެ.
އޭގެ އިތުރުން ލަންކާގެ ކަނޑުގެ އެއްވެސް ސަރަހައްދެއްގައި ސައިންސްގެ ދިރާސާއެއް އަދި ތަހުލީލެއް ހިންގުމުގެ ހުއްދަ ބޯޓަށް ނުދޭ ކަމަށް އެ މިނިސްޓްރީން ބުންޏެވެ.
ޗައިނާއިން ލަންކާގައި ބިނާކޮށް، ހިންގަމުންދާ ހަމްބަންޓޯޓާ ބަނދަަރަކީ އަަސްކަރީ ބަނދަރެއްގެ ގޮތުގައި ބޭނުންކޮށްފާނެތީ އިންޑިއާއިން ކަންބޮޑުވެ އެވެ. ޖުމުލަ 1.5 ބިލިއަން ޑޮލަރު ހޭދަކޮށްގެން ހެދި އެ ބަނދަރަކީ އޭޝިއާ އާއި ޔޫރަޕާ ދެމެދުގަައިވާ މައި ޝިޕިން ރޫޓް ކަައިރީގައި އޮންނަ ބަނދަރެކެވެ.
އިންޑިއާ ފޮރިން މިނިސްޓްރީގެ ތަރުޖަމާނު ކުރިން ވިދާޅުވީ ޗައިނާ މަނަވަރުގެ ދަަތުރު އިންޑިއާ ސަރުކާރުން މޮނީޓާ ކުރަމުންދާ ކަމަށާއި އިންޑިއާގެ ސަލާމަތާއި އިގްތިސާދީ މަސްލަހަތު ހިމާޔަތް ކުރާނެ ކަމަށެވެ.
ރޮއިޓާޒް ނޫހުން މީގެ ކުރިން ރިޕޯޓު ކުރި ގޮތުގައި މަނަވަރުގެ ދަަތުރާ މެދު ހިތްހަމަނުޖެހި އިންޑިއާ ސަރުކާރުން ވަނީ ލަންކާ ސަރުކާރަށް ރަސްމީކޮށް ޝަކުވާ ވެސް ހުށަހަޅައިފަ އެވެ.
ޗައިނާގެ ފޮރިން މިނިސްޓްރީން މިދިޔަ ހަފުތާގައި ބުނީ އެ ގައުމުން ކަނޑު ދަތުރު ކުރުމުގެ ހައްގު ބޭނުން ކުރަނީ ގާނޫނީ އިމުގެ ތެރެއިން ކަމަށެވެ.
ޗައިނާއިން އުއްމީދު ކުރަނީ ޗައިނާގެ ކަނޑުމަތީގެ ސަައިންޓިފިކް ރިސާޗްއާާ ގުޅޭ ކަންކަމަށް ރަނގަޅު ނަޒަރަކުން ބަލައި، ރަނގަޅަށް ރިޕޯޓު ކުރާނެ ކަމަށް. އާދައިގެ މަތިން އަދި ގާނޫނީ އިމުގެ ތެރެއިން ހިންގާ ކަނޑުމަތީގެ އެއްވެސް ހަރަކާތަކަަށް ހުރަސް ނާޅާނެ ކަމަށް އުއްމީދު ކުރަން،" ޗަައިނާ ފޮރިން މިނިސްޓްރީގެ ބަޔާނުގައިވެ އެވެ.
ފޮރިން ސެކިއުރިޓީ އެނެލިސްޓުން ބުނާ ގޮތުގައި "ޔުއާން ވާންގް 5" މަނަވަރަކީ ޗައިނާގެ އެންމެ ފަހުގެ ސްޕޭސް ޓްރެކިން މަނަވަރެކެވެ. އެ މަނަވަރުން ސެޓެލައިޓާއި، ރޮކެޓް އަދި އިންޓަަކޮންޓިނެންޓަލް ބެލިސްޓިކް މިސައިލްތަައް މޮނީޓާ ކުރެވޭނެ އެވެ.
ސްރީ ލަންކާގެ ބެލްޓް އެންޑް ރޯޑް އިނީޝިއޭޓިވް ކުންފުނިން ބުނީ ޔުއާން ވާންގް 5 މަނަވަރު ހަމްބަންޓޯޓާ ބަަނދަރުގައި ހަފްތާއެއް ވަންދެން އޮންނާނެ ކަމަށާއި އެ ދަތުރުގައި "ޖައްވު ޓްރެކް ކުރުމާއި، ސެޓެލައިޓް ކޮންޓްރޯލް ކުރުން" ކުރިއަށް ގެންދާނީ އިންޑިއާ ކަަނޑުގެ ހުޅަނގު އުތުރުގައި ކަމަށެވެ.
ލަަންކާގެ އެންމެ ދެކުނުގައި އޮންނަ ހަމްބަންޓޯޓާ ބަނދަރު ހިންގުން 2017 ވަނަ އަހަރު ޗަައިނާގެ ކުންފުންޏަކާ ހަވާލު ކުރީ، އެ ތަން ހެދުމަަށް ނެގި ލޯނު ނުދެއްކޭތީ 99 އަހަރުގެ މުއްދަތަކަަށެވެ. މީގެ ކުރިން 2014 ވަނަ އަހަރު ވެސް ޗައިނާގެ ސަބްމެރީނެއް އަދި ހަނގުރާމަ މަތީ މަނަވަރެއް ކޮލޮމްބޯ ބަނދަރާ ކައިރިވުމަށް ހުއްދަ ދިނުމުން އިންޑިއާއިން ހިތްހަމަނުޖެހުނެވެ.
