ޕީއެފްއޭގެ ގޮތުގައި ފާހަގަކޮށްފައިވާ ވިހަ ކެމިކަލްތަކެއްގެ ސަބަބުން މި ދުނިޔޭގެ އެއްވެސް ހިސާބެއްގައި ވާރޭ ފެން ބުއިން ރައްކާތެރި ނޫން ކަމަށް ސްޓޮކްހޯމް ޔުނިވާސިޓީގެ ސައިންސްވެރިން ހެދި ދިރާސާއަކުން ދައްކައިފި އެވެ.
ޕީއެފްއޭއަށް އާއްމުކޮށް ކިޔައި އުޅެނީ "ފޮއެވާ ކެމިކަލް" ނުވަތަ ދާއިމަށް ދެމިގެންވާ ކެމިކަލް އެވެ. އެއީ އެ ކެމިކަލްތައް ނެތި ދަނީ ވަރަށް ލަސް ދުވެއްޔެއްގައި ކަމަށް ވާތީ އެވެ. ޕީއެފްއޭ އެންމެ ފުރަތަމަ ފާހަގަވީ ޝޭމްޕޫ، މޭކަޕް ފަދަ ތަކެތިންނެވެ.
އެކަމަކު މިހާރު އެ ކެމިކަލް ދުނިޔޭގެ ހުރިހާ މާހައުލަކަށް ވެސް ވަނީ ފެތުރިފަ އެވެ. އެގޮތުން ވަޔާއި ފެނުގައި ވެސް އެ ކެމިކަލް އެކުލެވެ އެވެ. އާ ދިރާސާއިން އެނގުނީ ވާރޭ ފެނުގައި ޕީއެފްއޭ ހިމެނެނީ ނުރައްކާތެރި މިންވަރަށް ކަމެވެ.
"އަޅުގަނޑުމެން ހެދި ތަހުލީލުން އެނގުނީ މި ދުނިޔޭގެ އެއްވެސް ތަނަކުން ލިބޭ ވާރޭ ފެން ބުއިން ރައްކާތެރި ނޫންކަން،" ޕްރޮފެސަރު އިއަން ކަޒިންސް އޭއެފްޕީއަަށް ވިދާޅުވި އެވެ.
ސައިންސްވެރިންގެ ޓީމުން 2010 ވަނަ އަހަރުން ފެށިގެން އެއް ކުރި މައުލޫމާތުން އެނގުނީ އެންޓާކްޓިކާގައި ވެސް ވާރޭ ފެނުގައި ޕީއެފްއޭ އެކުލެވެނީ އެމެރިކާގެ އެންވާރަމެންޓަލް ޕްރޮޓެކްޝަން އެޖެންސީ (އީޕީއޭ) ގެ ގައިޑްލައިންގައިވާ މިންވަރަށް ވުރެ މަތީގައި ކަމެވެ.
އެގޮތުން އެމެރިކާގެ ގައިޑްލަައިންގައި ކަނޑައަޅާފައިވާ މިންވަަރަށް ވުރެ 14 ގުނަ އިތުރަށް އެންޓާކްޓިކާއިން ތަހުލީލު ކުރި ވާރޭ ފެނުން ޕީއެފްއޭ ފާހަގަވި އެވެ.
ޕީއެފްއޭ ކެމިކަލްތަކުން ކުޑަކުދިންގެ ދިފާއީ ނިޒާމު ބަލިކަށިވުމުގެ ފުރުސަތު އޮތްކަން ދާދި ފަހުން ހޯދިފައިވެ އެވެ. ޕީއެފްއޭއަކީ ފަސޭހައިން ނެތިދާ އެއްޗަކަށް ނުވާތީ، އެ ކެމިކަލް ހަށިގަނޑަށް ފޯރާ ނަމަ، ހަށިގަނޑުން ބޭރު ނުވެ، އިތުރަށް ޖަމާވަމުން ދާާނެ އެވެ.
ބައެއް ދިރާސާތަކުގައިވާ ގޮތުން ޕީއެފްއޭގެ ސަބަބުން ދަރިމައިވުމުގެ މައްސަލަތަކާއި، ކުޑަކުދިން ހެދިބޮޑުވުމުގައި ލަސްތައް ދިމާވުމާއި، އާދަޔާ ހިލާފަށް ފަލަވުމަަށް މަގުފަހިވުމާއި، ބައެއް ކަހަލަ ކެންސަރު ޖެހުން އަދި ކޮލެސްޓްރޯލް މަތިވުމުގެ ފުރުސަތު އޮވެ އެވެ.
