ލަންޑަންގެ ނަޖިސް ފެނުން ޕޯލިއޯ ވައިރަސް ފެނުމުން، އެ ސިޓީގައި ދިރިއުޅޭ އެއް މިލިއަން ކުދިންނަށް ޕޯލިއޯ ވެކްސިންގެ ބޫސްޓާ ޝޮޓެއް ދޭން ނިންމައިފި އެވެ.
އިނގިރޭސި ހެލްތު މިނިސްޓްރީން ބުނީ ބޫސްޓާ ޝޮޓް ދޭނީ ގްރޭޓާ ލަންޑަން އޭރިއާގައި ދިރިއުޅޭ އުމުރުން އެއް އަހަރާއި ނުވަ އަހަރާ ދެމެދުގެ ކުދިންނަށް ކަމަށެވެ.
އިނގިރޭސިވިލާތުން ޕޯލިއޯގެ އެއްވެސް ކޭސްއެއް ރިޕޯޓުކޮށްފައި ނުވި ނަމަވެސް، ލަަންޑަންގެ ނަޖިސް ފެން ޓްރީޓް ކުރާ ޕްލާންޓްތަކުން ހަދާ ޓެސްޓުން އެ ވައިރަސް ދަނީ ފެންނަމުންނެވެ.
ހެލްތު މިނިސްޓްރީގެ ބަޔާނުގައި ބުނީ ވައިރަސް ފެންނަމުންދާ މިންވަރަށް ބަލާއިރު، ކޮންމެވެސް ވަރަކަށް ބަލި ފެތުރެމުންދާ ކަމަށް ބެލެވެ އެވެ.
ވާގިނެތުން ނުވަތަ ޕެރެލަައިޒްވުމަށް މަގުފަހިވާ ޕޯލިއޯ ބަލީގެ ކޭސްއެއް އެންމެ ފަހުން އިނގިރޭސިވިލާތުގަައި ރިޕޯޓު ކުރީ 1984 ވަނަ އަހަރުގަ އެވެ.
މިހާރު އެ ވައިރަސް ފެންނަނީ ހަމައެކަނި ޕާކިސްތާން އަދި އަފްގާނިސްތާނުންނެވެ. ނަމަވެސް ޕޯލިއޯގެ ބަލިކަަށި ވައިރަހެއް ނަގައިގެން އުފެއްދި ވެކްސިނެއް ބޭނުންކުރެ އެވެ.
ޕޯލިއޯގެ ބަލިކަށި ވައިރަސް ހިމެނޭ ވެކްސިން ޖަހާފައި ތިބޭ މީހުންނަށް ބަލި ނުޖެހުނު ނަމަވެސް، އެ މީހުންގެ ފަރާތުން ތަަގައްޔަރުވެފައިވާ ފެން ވެކްސިން ނުޖަހާ ހުރި މީހަކަށް ފޯރައިފި ނަމަ ބަލި ޖެހުމުގެ ފުރުސަތު އޮވެ އެވެ.
އެހެންވެ، ޑަބްލިއުއެޗްއޯއިން ބާރު އަޅަނީ އޯރަލް ޕޯލިއޯ ވެކްސިން (އޯޕީވީ) ބޭނުން ކުރުން ހުއްޓާލައި، ޕޯލިއޯ ވައިރަސް ނުހިމެނޭ ނުވަތަ އިންއެކްޓިވޭޓެޑް ޕޯލިއޯ ވެކްސިން (އައިޕީވީ) ބޭނުން ކުރުމަށެވެ.
ޑަބްލިއުއެޗްއޯއިން ބުނީ ލަންޑަންގެ 87 ޕަސެންޓް މީހުން ޕޯލިއޯ ވެކްސިން ޖަހާފައިވާ ކަމަށެވެ. އިނގިރޭސިވިލާތުން 2004 ވަނަ އަހަރު އޯޕީވީ ހުއްޓާލާފައި ވާތީ، އޮފިޝަލުން ދެކޭ ގޮތުގައި ލަންޑަންގެ ނަޖިސް ސާމްޕަލަށް ވައިރަސް ފޯރީ، އެހެން ގައުމަކުން އޯޕީވީ ޖެހި މީހެއްގެ ފަރާތުންނެވެ.
މިދިޔަ މަހު ނިއު ޔޯކްގެ ރޮކްލޭންޑް ކައުންޓީގައި ޕޯލިއޯ ވައިރަހުގެ ސަބަބުން ފިރިހެނަކު ޕެރެލައިޒްވި އެވެ. އޮފިޝަލުން ބުނީ އެއީ ޕޯލިއޯއާ ދެކޮޅަށް ވެކްސިން ނުޖަހާ ހުރި މީހެއް ކަމަށެވެ.
ލަންޑަނާއި ގުދުސްގެ ޖަންކްޝަން ހޮޅިތަކުގެ ފެން ޓެސްޓު ކުރިއިރު، ޕޯލިއޯ ވައިރަސް ފެނިފައިވާ އިރު، އެކަން ގުޅިފައި ވަނީ އެމެރިކާގައި އެ ބަލި ޖެހުނު މީހާއާ އެވެ.
ޕޯލިއޯއަކީ އާއްމުކޮށް އުމުރުން ފަސް އަހަރުން ދަށުގެ ކުދިންނަށް ޖެހޭ ނުރައްކާތެރި ބައްޔެކެވެ. އެ ބަލި ނައްތާލަން ފެށި ބޮޑު ކެމްޕެއިންއާ އެކު ގިނަ ގައުމުތަކުން ވަނީ ކޭސްތައް ސުމަކަށް ތިރިކޮށްފަ އެވެ.
