ރަޝިއާއިން ހިފައިގެން އުޅޭ ކްރައިމިއާގައި ހިންގާ އަސްކަަރީ މަރުކަޒެއްގައި ގޮވުމެއް ގޮވައި އެކަކު މަރުވެއްޖެ އެވެ.
ރަޝިއާގެ އޮފިޝަލުން ބުނީ އެއްޗެއް ގޮވީ ނޯވޯފެޑޮރިވްކާ ކައިރީގައި ހުންނަ ސާކީ އަސްކަރީ މަރުކަޒުގައި ކަމަށެވެ.
އެ ގައުމުގެ ޑިފެންސް މިނިސްޓްރީން ފަހުން ބުނީ އެ ތަނުގައި ގޮވީ ރައްކާކޮށްފައި ހުރި ބޮން ފަދަ ތަކެތި ކަމަށެވެ.
އެ ހާދިސާއަށް ފަހު މަރުކަޒުގައި އަލިފާން ނުވާ ކަމަށް ވެސް މިނިސްޓްރީން ބުންޏެވެ. ދައުރުވަމުންދާ ވީޑިއޯތަކުން އިވެނީ އެ ތަނުގައި ގިނަ ގޮވުންތަކެއް ގޮވާ އަޑެވެ.
ކްރައިމިއާއަކީ ރަޝިއާއިން 2014 ވަނަ އަހަރު ހިފި ޔޫކްރެއިންގެ ސަރަހައްދެކެވެ. އެއީ ރަޝިއާގެ ފަތުރުވެރިންގެ މެދުގައި މަގްބޫލް މަންޒިލެކެވެ.
ހަނގުރާމައިގައި ޔޫކްރެއިންގެ އެހެން ހިސާބުތަކަށް ބޮޑެތި ގެއްލުންތައް ލިބެމުން ދިޔަ ނަމަވެސް، މިހާތަނަށް ކްރައިމިއާގައި އެއްވެސް ހަމަލާއެއް ނުދެ އެވެ.
އެ މަރުކަޒުގަައި ގޮވުމެއް ގޮވި ސަބަބާ މެދު ރަޝިއާއިން މިހާތަނަށް އެއްޗެއް ނުބުނާ އިރު، ޔޫކްރެއިނުން ވެސް އެކަމުގެ ޒިންމާ ނަގާފައެއް ނުވެ އެވެ.
އެކަމަކު ޔޫކްރެއިންގެ ޑެޕިއުޓީ ބޮޑު ވަޒީރު އައިރީނާ ވެރެޝުކް ޓެލެގްރާމްގައި ވިދާޅުވީ އެ ގޮވުންތަކުން ހަނދާންކޮށްދެނީ ކްރައިމިއާގެ އަސްލު ވެރިންނަކީ ކޮން ބައެއްކަން ކަމަށެވެ.
