ޗައިނާގެ މަނަވަރު ޔުއާންގް ވާންގް 5، ހަމްބަންޓޯޓާ ބަނދަރާ ކައިރި ކުރުން ފަސްކޮށްދޭން އެދުނުކަން ސްރީލަންކާގެ ސަރުކާރުން ހޯމަ ދުވަހު ޔަގީންކޮށްދީފި އެވެ.
ލަންކާ ފޮރިން މިނިސްޓްރީން ނެރުނު ބަޔާނެއްގައި ބުނީ ޗައިނާއިން ހިންގާ ހަމްބަންޓޯޓާ ބަނދަރަށް ޔުއާން ވާންގް 5 ކައިރި ކުރަން ހަމަޖެހިފައި އޮތީ އޯގަސްޓް 11 ވަނަ ދުވަހު ތެޔޮ އެޅުމަށް ކަމަށާއި އެ ބަނދަރުން ފުރުމަށް ހަމަޖެހިފައި އޮތީ އޯގަސްޓް 17 ވަނަ ދުވަހު ކަމަށެވެ.
"މި މަނަވަރު ހަމްބަންޓޯޓާ ބަނދަރަށް ކައިރި ކުރުން ފަސްކުރަން އެދި މިނިސްޓްރީން ވާނީ ކޮލޮމްބޯގައި ހުންނަ ޗައިނާގެ އެމްބަސީއަށް ހުށަހަޅާފައި،" ބަޔާނުގަައިވެ އެވެ.
ސްރީލަންކާ އާއި ޗައިނާއާ ދެމެދު އޮތީ ގާތް ގުޅުމެއް ކަމަށާއި އެ ގުޅުމަށް ބަދަލެއް ނާންނަ ކަމަށް ބަޔާނުގައި ފާހަގަކުރި އެވެ. އެގޮތުން ދާފި ފަހުން ލަންކާގެ ފޮރިން މިނިސްޓަރު އަލީ ސަބްރީ އާއި ޗައިނާގެ ފޮރިން މިނިސްޓަރު ވާންގް ޔީ ބައްދަލުކުރެއްވި ކަމަށް ބަޔާނުގައިވެ އެވެ.
ނޫސްތަކުން ރިޕޯޓު ކުރާ ގޮތުގައި ޗައިނާގެ މަނަވަރުގެ ދަތުރު ފަސްކުރަން ލަންކާއިން އެދުނީ އިންޑިއާގެ ޕްރެޝަރާ ހެދި އެވެ. އެއީ ދިރާސާ ކުރުމަށް ހާއްސަ ބޯޓެއް ނަމަވެސް އިންޑިއާގެ ނޫސްތަކުން ރިޕޯޓު ކުރާ ގޮތުގައި ޗައިނާގެ ޖާސޫސީ މަސައްކަތް ވެސް އެ ބޯޓުން ކުރެ އެވެ.
ޗައިނާއިން ލަންކާގައި ބިނާކޮށް، ހިންގަމުންދާ ހަމްބަންޓޯޓާ ބަނދަަރަކީ އަަސްކަރީ ބަނދަރެއްގެ ގޮތުގައި ބޭނުންކޮށްފާނެތީ އިންޑިއާއިން ކަންބޮޑުވެ އެވެ. ޖުމްލަ 1.5 ބިލިއަން ޑޮލަރު ހޭދަކޮށްގެން އެޅި އެ ބަނދަރަކީ އޭޝިއާ އާއި ޔޫރަޕާ ދެމެދުގަައިވާ މައި ޝިޕިން ރޫޓް ކަައިރީގައި އޮންނަ ބަނދަރެކެވެ.
އިންޑިއާ ފޮރިން މިނިސްޓްރީގެ ތަރުޖަމާނު ކުރިން ވިދާޅުވީ ޗައިނާ މަނަވަރުގެ ދަަތުރު އިންޑިއާ ސަރުކާރުން މޮނީޓާ ކުރަމުންދާ ކަމަށާއި އިންޑިއާގެ ސަލާމަތާއި އިގްތިސާދީ މަސްލަހަތު ހިމާޔަތް ކުރާނެ ކަމަށެވެ.
ރޮއިޓާޒް ނޫހުން މީގެ ކުރިން ރިޕޯޓު ކުރި ގޮތުގައި މަނަވަރުގެ ދަަތުރާ މެދު ހިތްހަމަނުޖެހި އިންޑިއާ ސަރުކާރުން ވަނީ ލަންކާ ސަރުކާރަށް ރަސްމީކޮށް ޝަކުވާ ވެސް ހުށަހަޅައިފަ އެވެ.
ޗައިނާގެ ފޮރިން މިނިސްޓްރީން މިދިޔަ ހަފްތާގައި ބުނީ އެ ގައުމުން ކަނޑު ދަތުރު ކުރުމުގެ ހައްގު ބޭނުން ކުރަނީ ގާނޫނީ އިމުގެ ތެރެއިން ކަމަށެވެ.
"ޗައިނާއިން އުއްމީދު ކުރަނީ ޗައިނާގެ ކަނޑުމަތީގެ ސަައިންޓިފިކް ރިސާޗްއާާ ގުޅޭ ކަންކަމަށް ރަނގަޅު ނަޒަރަކުން ބަލައި، ރަނގަޅަށް ރިޕޯޓު ކުރާނެ ކަމަށް. އާދައިގެ މަތިން އަދި ގާނޫނީ އިމުގެ ތެރެއިން ހިންގާ ކަނޑުމަތީގެ އެއްވެސް ހަރަކާތަކަަށް ހުރަސް ނާޅާނެ ކަމަށް އުއްމީދު ކުރަން،" ޗަައިނާ ފޮރިން މިނިސްޓްރީގެ ބަޔާނުގައިވެ އެވެ.
ފޮރިން ސެކިއުރިޓީ އެނެލިސްޓުން ބުނާ ގޮތުގައި ޔުއާން ވާންގް 5 މަނަވަރަކީ ޗައިނާގެ އެންމެ ފަހުގެ ސްޕޭސް ޓްރެކިން މަނަވަރެކެވެ. އެ މަނަވަރުން ސެޓެލައިޓާއި، ރޮކެޓް އަދި އިންޓަަކޮންޓިނެންޓަލް ބެލިސްޓިކް މިސައިލްތަައް މޮނީޓާ ކުރެވޭނެ އެވެ.
ސްރީލަންކާގެ ބެލްޓް އެންޑް ރޯޑް އިނީޝިއޭޓިވް ކުންފުނިން ބުނީ ޔުއާން ވާންގް 5 މަނަވަރު ހަމްބަންޓޯޓާ ބަަނދަރުގައި ހަފްތާއެއް ވަންދެން އޮންނާނެ ކަމަށާއި އެ ދަތުރުގައި "ޖައްވު ޓްރެކް ކުރުމާއި، ސެޓެލައިޓް ކޮންޓްރޯލް ކުރުން" ކުރިއަށް ގެންދާނީ އިންޑިއާ ކަަނޑުގެ ހުޅަނގު އުތުރުގައި ކަމަށެވެ.
ލަަންކާގެ އެންމެ ދެކުނުގައި އޮންނަ ހަމްބަންޓޯޓާ ބަނދަރު ހިންގުން 2017 ވަނަ އަހަރު ޗަައިނާގެ ކުންފުންޏަކާ ހަވާލު ކުރީ، އެ ތަން ހެދުމަަށް ނެގި ލޯނު ނުދެއްކޭތީ 99 އަހަރުގެ މުއްދަތަކަަށެވެ. މީގެ ކުރިން 2014 ވަނަ އަހަރު ވެސް ޗައިނާގެ ސަބްމެރީނެއް އަދި ހަނގުރާމަ މަތީ މަނަވަރެއް ކޮލޮމްބޯ ބަނދަރާ ކައިރިވުމަށް ހުއްދަ ދިނުމުން އިންޑިއާއިން ހިތްހަމަނުޖެހުނެވެ.
