ދ. ކުޑަހުވަދޫ އެއާޕޯޓު ސަރަހައްދުގައި ރޭން ފެށިގެން މުޒާހަރާ ކުރަމުންދާ ދަނީ ބަލި މީހަކު އިތުރު ފަރުވާ އަށް މާލެ ގެނެސް ނުދީގެން ކަމަށް ބުނާ ވާހަކަތައް މަންޓާ އެއާއިން ދޮގުކޮށްފި އެވެ.
ކުޑަހުވަދޫ މީހުން މުޒާހަރާ ކުރަމުން ދަނީ އެރަށު ފެނަކައިގައި އެސިސްޓެންޓް މެނޭޖަރެއްގެ ވަޒީފާގައި ހުރި ފާރިހް ނަމަކަށް ކިޔާ މީހަކަށް ހާޓް އެޓޭކެއް ޖެހުމުން އެމަޖެންސީކޮށް މާލެ ގެންގޮސްދިނުމަށް އެދުމުން އެއާޕޯޓުން އެކަމަށް ހުރަސްއަޅާފައިވާ ކަމަށް ބުނެ އެވެ.
ރޭން ފެށިގެން އެ ރަށު އެއާޕޯޓް ސަރަހައްދުގައި ދަނީ ގިނަ އަދަދެއްގެ ރައްޔިތުން އެއްވެ އަޑު އުފުލަން ފަށާފަ އެވެ. އަދި ރެއިން ފެށިގެން ވަނީ އެ އެއާޕޯޓުގެ ބޭރުގައި މީހުންނަށް ނުނިކުމެވޭނެހެން ޓިނުޖަހާ ބަންދުކޮށްފަ އެވެ.
އެތެރޭގެ އުދުހުންތަކުގެ ހިދުމަތްދޭ މަންޓާ އެއާގެ އޮފިޝަލަކު "އަދަދު"އަށް ވިދާޅުވީ އިއްޔެ އެކަން ހިނގައިގެން މިއަދާ ހަމައަށްވެސް އެއްވެސް ފަރާތަކުން މީހަކު ބަލިވެގެން ދަތުރުކުރަން މަންޓާއަށް ރިކުއެސްޓެއް ކޮށްފައި ނުވާ ކަމަށެވެ.
"މަންޓާގެ އެއާޕޯޓުގައި ހުރި ކުއްޖަކަށް ކޮންމެވެސް މީހަކު ގުޅާފަ އަހާލި ކިހިނެތް ހެއްޔޭ އޮންނަނީ ބަލި މީހަކު ގެންދަން ޓްރާންސްޕޯޓު ކުރުމަށް އޮންނަ ޕްރޮސީޖާއަކީ ކޮބައިތޯ. އެކުއްޖާ ކިޔާދިން. އޭރުވެސް ނުބުނޭ ބަލި މީހަކު ގެންދަން އުޅޭ ކަމެއް،" އޭނާ ވިދާޅުވި އެވެ.
ކަމެއް ހިނގައިގެން އުޅޭކަން އެނގުނީ އިއްޔެ ހަވީރު މުޒާހަރާ ކުރަން ފެށުމުން ކަމަށާއި އެ ވަގުތުން ފެށިގެން ކުރެވުނު ހުރިހާ ކަމެއް ކޮށްދީފައިވާނެ ކަމަށް އޭނާ ވިދާޅުވި އެވެ.
"އޭޓީއާރް އެއާކްރާފްޓަކީ އެ އެއާކްރާފްޓު އިންނަ ގޮތުން ސްޓްރެޗާއެއް އެރުވޭގޮތަށް އިންނަ ބޯޓެއް ނޫން،" އޮފިޝަލް ވިދާޅުވި އެވެ.
ނަމަވެސް މީގެ ކުރިން ވެސް ބަލި މީހުން އެ އެއާލައިނުން އުފުލާ ކަމަށާއި އެކަމަކު ޖެހޭނީ ޑޮކިޔުމަންޓްތައް ފުރިހަމަ ކުރުމަށްފަހު ކަމުގައި ކަމަށް އޭނާ ވިދާޅުވި އެވެ. އަދި ބަލި މީހާ އަކީ ގޮނޑީގައި އިށީންދެގެން ދަތުރު ކުރެވޭ ހާލަތުގައި ހުރި މީހެއްނަމަ އެކަން ކޮށްދޭކަން އޭނާ ފާހަގަކުރެއްވި އެވެ.
"އަޅުގަނޑުމެން އެ ބަލި މީހާ ގެންދަން މި ބެލީ ސީޕްލޭނެއްގައި. ސީޕްލޭން ދަތުރު ކުރާނީ ދުވާލު އެކަނި ވީމަ، ރިކުއެސްޓެއް ނާދޭ. އެކަމަކުވެސް އެ މީހާ ގެންދަން ބުނެފާނެ ކަމަށް ސީޕްލޭނެއް ރެޑީކުރިން ގޮނޑިތައް ނައްޓާ އެކޮޅަށް އިރު އެރިއިރު ފުރުވާލަން ރެޑީކޮށްފައި އޮންނާނީ. ނަމަވެސް ފަހުން މޯލްޑިވިއަންގެ ފްލައިޓެއް ހަމަޖައްސައިގެން ގޮސް އެ މީހާ މާލެއަށް ގެންގޮސްފި،" އެ އޮފިޝަލް ވިދާޅުވި އެވެ.
ކުޑަހުވަދޫ އެއާޕޯޓަށް އެހެން އެއާލައިންތައް ދަތުރުކުރުން މަންޓާއިން ހުރަސްއަޅާ ކަމުގެ ތުހުމަތު ވެސް ކުރަމުންދާއިރު، އޮފިޝަލް ވިދާޅުވީ މަންޓާއިން ވެސް އެ އެއާޕޯޓަށް ދަތުރުކުރަނީ އެ އެއާޕޯޓަށް ދައްކަން ޖެހޭ ފީތައް ދައްކައިގެން ކަމަށެވެ. އެހެން ކަމުން އެއާޕޯޓަށް ދައްކަން ޖެހޭ ފީ ދެއްކުމުން އެހެން ފްލައިޓްތަކަށް ވެސް ޖެއްސޭނެ ކަމަށް މަންތާއިން ބުންޏެވެ.
މި ހާދިސާ ހޫނުވެ، ރޭ އެ ރަށަށް ދިޔަ ފްލައިޓުން ފޭބި ދިވެހިންނަށް ބޯޓުން ފައިބަން ފުރުސަތު ދިން ނަމަވެސް އޭގެން އައި ފަތުރުވެރިއަކަށް އެއާޕޯޓުން ނުނިކުމެވޭނެ ގޮތަށް މަގު މަތީގައި ވަނީ ވަޅުގަނޑުތަކެއް ކޮނެ ޓިނުޖަހާ ބަންދުކޮށްފަ އެވެ. ނަމަވެސް ފަހުން ވަނީ އެ ފަތުރުވެރިޔާއަށް ވެސް ފުރުސަތު ދީފަ އެވެ.
މުޒާހަރާކުރަން ކުޑަހުވަދޫގެ ގިނަ އަދަދެއްގެ ރައްޔިތުން ނުކުމެފައިވާއިރު، ބަލި މީހުންނާއި، ހާލުބޮޑު ސީރިއަސް ބަލި މީހުންވެސް އުފުލޭނެ އިންތިޒާމުތައް އެއާޕޯޓުން ހަމަޖެއްސައި ނުދޭނަމަ މުޒާހަރާ ނުހުއްޓާނެ ކަމަށްވެސް ދަނީ ބުނަމުންނެވެ.
