ހަނގުރާމައިގެ ސަބަބުން ޔޫކްރެއިންގައި ތާށިވެފައި ހުރި ގޮދަނުގެ ފުރަތަމަ ޝިޕްމަންޓް، ރަޝިއާއާ އެކު ސޮއިކުރި އެއްބަސްވުމެއްގެ ދަށުން، ހޯމަ ދުވަހު ޔޫކްރެއިންގެ ބަނދަރަކުން ފުރައިފި އެވެ.
ޔޫކްރެއިން އަދި ތުރުކީގެ އޮފިޝަލުން ބުނީ ގޮދަނުގެ ފުރަތަމަ ޝިޕްމަންޓް ހިފައިގެން ހޯމަ ދުވަހުގެ ހެނދުނު ބޯޓު ފުރީ އޮޑެއްސާ ބަނދަރުން ކަމަށެވެ.
ފެބްރުއަރީ މަހު ހަނގުރާމަ ފެށި ފަހުން، ރަޝިއާއިން ދިޔައީ ޔޫކްރެއިންގެ ބަނދަރުތަކަށް އަމާޒު ކުރަމުންނެވެ. ނަމަވެސް ގޮދަނުގެ ޝިޕްމަންޓަށް ފުރުސަތު ދިނުމުގެ ގޮތުން ދާދި ފަހުން ދެ ގައުމުން އެއްބަސްވުމަކަށް ދިޔަ އެވެ.
އެ އެއްބަސްވުމާ އެކު ދުނިޔެއަށް ދިމާވެފައިވާ ކާބޯތަކެތީގެ ކާރިސާއަށް ކޮންމެވެސް ވަރެއްގެ ލުޔެއް ލިބި، ގޮދަނުގެ އަގު ތިރި ކުރެވޭނެ ކަމުގެ އުއްމީދު އެބަ އޮތެވެ.
ސިއެރާ ލިއޯންގެ ދިދަ ނަގާފައިވާ ބޯޓު ފުރުމުގެ ކުރިން ނެރުނު ބަޔާނެއްގައި ތުރުކީއިން ބުނީ ބޯޓު ބަނދަރު ކުރާނީ ލުބްނާނުގައި ކަމަށާއި ކުރިއަށް އޮތް ހަފްތާތަކުގައި އިތުރު ބޯޓުތައް ފުރާނެ ކަމަށެވެ.
އެއްބަސްވުމުގެ ދަށުން އިސްތަންބޫލުގައި ހުޅުވާފައިވާ ޖޮއިންޓް ކޯޑިނޭޝަން ސެންޓަރު (ޖޭސީސީ) އިން ބުނީ ބޯޓުގައި ހުރީ 26،000 ޓަނުގެ ޒުވާރު ކަމަށާއި ބަލައި ފާސްކުރުމަށް ތުރުކީއާ ހަމައަށް ފޯރާނީ އަންގާރަ ދުވަހު ކަމަށެވެ.
ރަޝިއާ އާއި ޔޫކްރެއިނަށް އެއްބަސްވުމަކާ ހަމައަށް އާދެވުނީ ދެ މަސް ވަންދެން ކުރި މަޝްވަރާއަށް ފަހު އެވެ. އެއްބަސްވުމަށް އަމަލު ކުރަމުން ދާނީ 120 ދުވަހުގެ މުއްދަތަކަށެވެ. ދެ ފަރާތުން އެއްބަސްވެއްޖެ ނަމަ މުއްދަތު އިތުރު ކުރެވޭނެ އެވެ.
