ކޮވިޑް ބަލިމަޑުކަމާ ގުޅިގެން މާޗް 2020 ވަނަ އަހަރު ބަންދު ކުރި ނިއުޒީލޭންޑުގެ ބޯޑަރުތައް އެއްކޮށް ހުޅުވާލައިފި އެވެ.
ނިއުޒީލޭންޑަށް އެތެރެވުމުގެ ވިސާ އޮތް ފަތުރުވެރިންނާއި ސްޓުޑެންޓް ވިސާގައި ދަތުރު ކުރާ ހުރިހާ އެންމެންނަށް ދެން އެ ގައުމަށް އެތެރެވެވޭނެ އެވެ.
ބޮޑު ވަޒީރު ޔަސިންޑާ އާޑާން ވިދާޅުވީ މިއީ "ބޮޑު ވަގުތެއް" ކަމަށާއި މިއީ "ފަރުވާތެރިކަމާ އެކު ކުރިއަށް ގެންދާ ރޭވުމުގެ" މަރުހަލާއެއް ކަމަށެވެ.
ނިއުޒީލޭންޑްގެ ބޯޑަރު ހުޅުވާލި ނަމަވެސް، ގިނަ ދަތުރުވެރިން ކޮވިޑް ވެކްސިން ފުރިހަަމަ ކުރުން މަޖުބޫރު ވާނެ އެވެ. އެހެން ނަމަވެސް، އެތެރެވުމަށް ފަހު ކަރަންޓީންވުމެއް ދެން ނޯންނާނެ އެވެ.
ވައިގެ ބޯޑަރުތަަކުގެ އިތުރުން ކަނޑުގެ ބޯޑަރުތައް ވެސް މިހާރު ވަނީ އެއްކޮށް ހުޅުވާލާފަ އެވެ. އެހެންކަމުން ކްރޫޒް ބޯޓުތަކާއި ބޭރުގެ ޔޮޓުތަކަށް ނިއުޒީލޭންޑުގައި ބަނދަރު ކުރެވޭނެ އެވެ.
ފުރަތަމަ މަރުހަލާގެ ދަށުން ނިއުޒީލޭންޑުގެ ބޯޑަަރު އެންމެ ފުރަތަމަ ހުޅުވާލީ ފެބްރުއަަރީގަަ އެވެ. އެ ފަހަރު ހުއްދަ ދިނީ ވެކްސިން ފުރިހަމަކޮށްފައިވާ ނިއުޒީލޭންޑް ރައްޔިތުން އޮސްޓްރޭލިއާއިން ނިއުޒީލޭންޑަށް އެތެރެވެވޭ ގޮތަށެވެ.
އޭގެ ފަހުން އެހެން ގައުމުތަކުން އަންނަ ވެކްސިން ފުރިހަމަކޮށްފައިވާ ނިއުޒީލޭންޑްގެ ރައްޔިތުންނަށް ބޯޑަރު ހުޅުވާލީ މާޗް މަހުގަ އެވެ. މިދިޔަ މޭ މަހު، ވިސާގެ ލުއި ލިބޭ 50 ގައުމަކުން ވެކްސިން ފުރިހަމަކޮށްފައި ތިބި ފަތުރުވެރިންނަށް ހުޅުވާލި އެވެ.
ކޮވިޑާ ގުޅިގެން ނިއުޒީލޭންޑުގައި އެޅި ހަަރުކަަށި ފިޔަވަޅުތަކުގެ އެންމެ ބޮޑު އަސަރެއް ކުރީ ފަތުރުވެރިކަަމުގެ ސިނާއަތަށެވެ. މާޗް 2021 ވަނަ އަހަރު، ފަތުރުވެރިކަމުން ނިއުޒީލޭންޑުގެ ޖީޑީޕީއަަށް ކުރާ ހިއްސާާ 5.5 ޕަސެންޓުން 2.9 ޕަސެންޓަށް ވެއްޓުނެވެ.
