ޔޫކްރެއިންގެ ދެކުނު މައިކޮލާއިވް ސިޓީއަށް ރަޝިއާއިން ދިން ހަމަލާއެއްގައި ޔޫކްރެއިން އެންމެ ބޮޑު އެއް މަހުޖަނު އަދި އޭނާގެ އަންހެނުން މަރުވެއްޖެ އެވެ.
އުމުރުން 74 އަހަރުގެ އޮލެކްސީ ވަޑަޓުރްސްކީ އަދި އަންހެނުން ރައިސާ މަރުވީ ދަންވަރުގެ ވަަގުތުގައި އެ މީހުން ދިރިއުޅޭ ގެޔަށް ފޮނުވި މިސައިލް ހަމަލާއެއްގަ އެވެ.
ވަޑަޓުރްސްކީއަަކީ ނިބިޔުލޮން ކުންފުނީގެ ވެރިޔާ އެވެ. އެއީ ޔޫކްރެއިންގައި އުފައްދާ ގޮދަން އެކްސްޕޯޓް ކުރުމުގެ ވިޔަފާރި ކުރާ ކުންފުންޏެކެވެ. އޭނާއަކީ "ހީރޯ އޮފް ޔޫކްރެއިން" އެވޯޑް ހާސިލްކޮށްފައިވާ މީހެކެވެ.
މައިކޮލާއީވްގެ މޭޔަރު އޮލެކްސެންޑަރު ސެންކެވިޗް ވިދާޅުވީ ވަޑަޓުރްސްކީ މަރުވީ މިހާތަނަށް ރަޝިއާއިން އެ ސިޓީއަށް ދިން އެންމެ ބޮޑު ހަމަލާގައި ކަމަށެވެ. އެ ހަމަލާގައި ހޮޓަލަކާއި، ސްޕޯޓްސް ކޮމްޕްލެކްސްއަކާއި، ދެ ސްކޫލާއި ގިނަ އަދަދެއްގެ ގެ ސުންނާފަތިވި އެވެ.
ބްލެކް ސީގައި އޮންނަ ޔޫކްރެއިންގެ އޮޑެއްސާ ބަނދަރަށް ދެވޭ މައި މަގު އޮންނަނީ މައިކޮލާއީވް ތެރޭގަ އެވެ. އެހެންވެ، ރަޝިއާގެ އެންމެ ގިނަ ހަމަލާ އަމާޒުވާ އެއް ސިޓީއަކީ މައިކޮލާއީވް އެވެ.
ޔޫކްރެއިންގެ ރައީސް ވޮލޮޑިމިރް ޒެލެންސްކީގެ އެޑްވައިޒަރަކު ވިދާޅުވީ ރަޝިއާއިން ވަޑަޓުރްސްކީއަށް ހަމަލާ ދިނީ ގަސްތުގަައި އޭނާ މަަރާލަން ކަމަށެވެ.
މީކާއިލޯ ޕޮޑޮލިޔަކް ވިދާޅުވީ އެއް މިސައިލު އެރީ ވަޑަޓުރްސްކީގެ ކޮޓަރިއެއް ކަމަށާއި އެހެންކަމުން އެއީ ސީދާ ޓާގެޓަށް ފޮނުވި މިސައިލެއް ކަމާ މެދު އެއްވެސް ޝައްކެއް ނެތް ކަމަށެވެ.
