ޔޫކްރެއިންގެ ބާރުގެ ދަށުގައި އޮތް ޑޮނެސްކްގެ އިރުމަތީ ހިސާބުތަކުގައި ދިރިއުޅޭ އާއްމުން އެ ތަން ދޫކޮށް ދިޔުމަށް ރައީސް ވޮލޮޑިމިރް ޒެލެންސްކީ އަމުރު ކުރައްވައިފި އެވެ.
ރޭ ދަންވަރު ގައުމާ މުހާތަބު ކުރައްވައި ޒެލެންސްކީ ވިދާޅުވީ އެ ހިސާބުގައި ހަނގުރާމަ އިތުރަށް ގޯސްވެދާނެ ކަމަށެވެ.
"މި ވަގުތު ޑޮނެސްކް ސަރަހައްދު ދޫކޮށް ވީހާވެސް ގިނަ ބަޔަކު ގޮސްފި ނަމަ، ރަޝިއާގެ ސިފައިންނަށް މާ ގިނަ ބަޔަކު މެރުމަށް ވަގުތަށް ނުލިބޭނެ،" ޒެލެންސްކީ ވިދާޅުވި އެވެ.
ޑޮނެސްކްގެ އިރުމަތީގައި ހަނގުރާމަަ ކުރިއަށް ދާތާ ގިނަ ދުވަސްތަކެއް ވެފައިވާ އިރު، ރަޝިއާއިން މަސައްކަތް ކުރަނީ އެ ތަނުގެ ފުރިހަމަ ކޮންޓްރޯލް ހޯދުމަށެވެ.
ޑޮނެސްކްގައި ތިބި އާއްމުން އެ ތަނުން ދިޔުމަށް ގޮވާލާފައިވާ އިރު، ރަޝިއާއަށް ތާއީދު ކުރާ ޔޫކްރެއިންގެ މީހުން ކޮންޓްރޯލް ކުރާ ޑޮނެސްކްގެ ހިސާބެއްގައި ހުރި ޖަލަކަށް ދިން ހަމަލާއެއްގެ މައްސަލަ ވަނި ހޫނުވެފަަ އެވެ.
އެ ޖަލަކީ ހަނގުރާމައިގެ މައިދާނުން އަތުލައިގަތް ޔޫކްރެއިން މީހުން ބަންދުކޮށްފައި ތިބި ޖަލެކެވެ. އެ ތަނަށް ދިން ހަމަލާގައި 50 ގައިދީން މަރުވި އެވެ.
ހަމަލާގެ ތުހުމަތު އެއް ބަޔަކު އަނެއް ބަޔަކަށް ކުރާ އިރު، ޔޫކްރެއިނުން ބުނީ އެއީ ޖަލުގައި ހިންގާ ލާއިންސާނީ އަނިޔާ އާއި ގަތުލުއާއްމު ފޮރުވުމަށް ރަޝިއާއިން ހިންގި އަމަލެއް ކަމަށާއި އދ. އާއި ރެޑް ކްރެސެންޓުން އެކަން ބަލަން ޖެހޭނެ ކަމަށެވެ.
ރަޝިއާއިން ބުނީ އެ ހަމަލާ ދިނީ ޔޫކްރެއިނުން ކަމަށާއި ހަމަލާގައި ބޭނުން ކުރި އެމެރިކާގައި އުފައްދާ ބާވަތުގެ ހަތިޔާރުގެ ބައިތައް ވެސް އެބަ ހުރި ކަމަށެވެ. އަދި މިނިވަން ތަހުގީގަކަށް ފުރުސަތު ދޭނެ ކަމަށް ބުންޏެވެ.
