ރަޝިއާއިން ހިފާފައިވާ ޔޫކްރެއިންގެ ސަރަހައްދެއްގައި ހުރި ޖަލަކަށް ދިން ހަމަލާއެއްގައި ޔޫކްރެއިންގެ 50 އަށް ވުރެ ގިނަ މީހުން މަރުވި މައްސަލަ ތަހުގީގު ކުރަން އެ ގައުމުން އދ. އާއި ރެޑް ކްރޮސްއަށް ގޮވާލައިފި އެވެ.
އެ ޖަލުގައި ތިބީ ހަނގުރާމައިގެ މައިދާނުން އަތުލައިގަނެ، ބަންދުކޮށްފައި ތިބި ޔޫކްރެއިން ރައްޔިތުންނެވެ. ރެޑް ކްރޮސްއިން ބުނީ ސަލާމަތްވި މީހުން ރައްކާތެރި ހިސާބުތަކަށް ގެންގޮސް، ފަރުވާ ދިނުމުގެ މަސައްކަތް ކުރުމަށް ހުއްދަ ލިބޭތޯ ބަލަމުންދާ ކަމަށެވެ.
އެ ޖަަލު ކޭމްޕަށް ހަމަލާ ދިނީ ޔޫކްރެއިނުން ކަމަށް ރަޝިއާއިން ބުނެ އެވެ. އެކަމަކު ޔޫކްރެއިނުން ތުހުމަތުގެ އިނގިލި ދިއްކުރަނީ ރަޝިއާ އަށެވެ. ހަމަލާގައި ސުންނާފަތިވި ޖަލު ހުންނަނީ އޮލެވިންކާގަ އެވެ. އެއީ ރަޝިއާއަށް ތާއީދު ކުރާ އިރުމަތީ ޔޫކްރެއިންގައި އޮންނަ ޑޮނެސްކް ޕީޕަލްސް ރިޕަބްލިކްގެ ހިސާބެކެވެ.
ޔޫކްރެއިނުން ބުނީ ރަޝިއާއިން އެ ޖަލަށް އަމާޒުކޮށް ހަމަލާ ދިނީ ލާއިންސާނީ އަނިޔާ އާއި ގަތުލުއާއްމުގެ ހެކި ނައްތާލުމަށް ކަމަށެވެ. ރައީސް ވޮލޮޑިމިރް ޒެލެންސްކީ އެ ހަމަލާ ސިފަކުރެއްވީ "ގަސްތުގައި ރަަޝިއާއިން ހިންގި ޖަރީމާއެއް"ގެ ގޮތުގަ އެވެ.
ނަަމަވެސް ރަޝިއާއިން ބުނީ ޖަލަށް އަމާޒުވީ ޔޫކްރެއިންގެ ރޮކެޓުތަކެއް ކަމަށެވެ. ޑޮނެސްކް ޕީޕަލްސް ރިޕަބްލިކްގެ ތަރުޖަމާނު ޑަނީލް ބެޒްސޮނޯވް ވިދާޅުވީ ރޮކެޓު ހަމަލާތައް އަމާޒުވީ ސީދާ ގައިދީން ބަންދުކޮށްފައި ތިބި ކޭމްޕަށް ކަމަށެވެ.
ރަޝިއާގެ ޑިފެންސް މިނިސްޓްރީން ބުނީ ހަމަަލާގައި ބޭނުން ކުރީ އެމެރިކާގައި އުފައްދާ ހިމާސް އާޓިލެރީ ކަމަށެވެ. ހިމާސް ސިސްޓަމުން ފޮނުވި ރޮކެޓުތަކުގެ ބައިތަކެއް ކަމަށް ބުނާ އެތިކޮޅުތަކެއް ރަޝިއާގެ ޑިފެންސް މިނިސްޓްރީން އާއްމުކޮށް ދައްކާލި އެވެ.
އެކަމަކު ޔޫކްރެއިނުން އެ ތުހުމަތު ދޮގުކޮށް، ގޮވާލީ އދ. އާއި ރެޑް ކްރޮސްއިން ތަހުގީގެއް ހިންގުމަށެވެ.
