ޗައިނާގެ އަސްކަރީ ބޯޓެއް ސްރީލަަންކާއަަށް ދަތުރު ކުރަން ހަމަޖެހިފައި ވާތީ އިންޑިއާއިން ކަންބޮޑުވުން ފާޅުކޮށްފައި ވަނިކޮށް، ގާނޫނީ ގޮތުން ހުއްދަ ކަނޑުގެ ހަރަކާތްތަކަށް ހުރަސް އަޅަން މަސައްކަތް ނުކުރުމަށް ޗައިނާއިން ގޮވާލަައިފި އެވެ.
ޗައިނާއިން ލަންކާގައި ބިނާކޮށް، ހިންގަމުންދާ ހަމްބަންޓޯޓާ ބަނދަަރަކީ އަަސްކަރީ ބަނދަރެއްގެ ގޮތުގައި ބޭނުންކޮށްފާނެތީ އިންޑިއާއިން ކަންބޮޑުވެ އެވެ. ޖުމްލަ 1.5 ބިލިއަން ޑޮލަރު ހޭދަކޮށްގެން އެޅި އެ ބަނދަރަކީ އޭޝިއާ އާއި ޔޫރަޕާ ދެމެދުގަައިވާ މައި ޝިޕިން ރޫޓް ކަައިރީގައި އޮންނަ ބަނދަރެކެވެ.
ރެފިނިޓިވް އެއިކޮންގެ ޝިޕިން ޑޭޓާ ދައްކާ ގޮތުން ދިރާސާތައް ކުރުމަށް ޗައިނާއިން ގެންގުޅޭ ޔުއާން ވާންގް 5 މަނަވަރު ހަމްބަންޓޯޓާ ބަނދަރާ ހަމައަށް ފޯރާނީ އޯގަސްޓް 11 ވަނަ ދުވަހު އެވެ.
މިދިޔަ ބުރާސްފަތި ދުވަހު އޮތް ނޫސްވެރިންގެ ބައްދަލުވުމުގައި އިންޑިއާ ފޮރިން މިނިސްޓްރީގެ ތަރުޖަމާނު ވިދާޅުވީ ޗައިނާ މަނަވަރުގެ ދަަތުރު އިންޑިއާ ސަރުކާރުން މޮނީޓާ ކުރަމުންދާ ކަމަށާއި އިންޑިއާގެ ސަލާމަތާއި އިގްތިސާދީ މަސްލަހަތު ހިމާޔަތް ކުރާނެ ކަމަށެވެ.
ރޮއިޓާޒް ނޫހުން މީގެ ކުރިން ރިޕޯޓު ކުރި ގޮތުގައި މަނަވަރުގެ ދަަތުރާ މެދު ހިތްހަމަނުޖެހި އިންޑިއާ ސަރުކާރުން ވަނީ ލަންކާ ސަރުކާރަށް ރަސްމީކޮށް ޝަކުވާ ވެސް ހުށަހަޅައިފަ އެވެ.
އެ ނޫހުގެ ސުވާލުތަކަށް ޖަވާބުދެމުން ޗައިނާގެ ފޮރިން މިނިސްޓްރީން ބުނީ އެ ގައުމުން ކަނޑު ދަތުރު ކުރުމުގެ ހައްގު ބޭނުން ކުރަނީ ގާނޫނީ އިމުގެ ތެރެއިން ކަމަށެވެ.
"ޗައިނާއިން އުއްމީދު ކުރަނީ ޗައިނާގެ ކަނޑުމަތީގެ ސަައިންޓިފިކް ރިސާޗްއާާ ގުޅޭ ކަންކަމަށް ރަނގަޅު ނަޒަރަކުން ބަލައި، ރަނގަޅަށް ރިޕޯޓު ކުރާނެ ކަމަށް. އާދައިގެ މަތިން އަދި ގާނޫނީ އިމުގެ ތެރެއިން ހިންގާ ކަނޑުމަތީގެ އެއްވެސް ހަރަކާތަކަަށް ހުރަސް ނާޅާނެ ކަމަށް އުއްމީދު ކުރަން،" ޗަައިނާ ފޮރިން މިނިސްޓްރީގެ ބަޔާނުގައިވެ އެވެ.
ފޮރިން ސެކިއުރިޓީ އެނެލިސްޓުން ބުނާ ގޮތުގައި ޔުއާން ވާންގް 5 މަނަވަރަކީ ޗައިނާގެ އެންމެ ފަހުގެ ސްޕޭސް ޓްރެކިން މަނަވަރެކެވެ. އެ މަނަވަރުން ސެޓެލައިޓާއި، ރޮކެޓް އަދި އިންޓަަކޮންޓިނެންޓަލް ބެލިސްޓިކް މިސައިލްތަައް މޮނީޓާ ކުރެވޭނެ އެވެ.
ސްރީލަންކާގެ ބެލްޓް އެންޑް ރޯޑް އިނީޝިއޭޓިވް ކުންފުނިން ބުނީ ޔުއާން ވާންގް 5 މަނަވަރު ހަމްބަންޓޯޓާ ބަަނދަރުގައި ހަފްތާއެއް ވަންދެން އޮންނާނެ ކަމަށާއި އެ ދަތުރުގައި "ޖައްވު ޓްރެކް ކުރުމާއި، ސެޓެލައިޓް ކޮންޓްރޯލް ކުރުން" ކުރިއަށް ގެންދާނީ އިންޑިއާ ކަަނޑުގެ ހުޅަނގު އުތުރުގައި ކަމަށެވެ.
ލަަންކާގެ އެންމެ ދެކުނުގައި އޮންނަ ހަމްބަންޓޯޓާ ބަނދަރު ހިންގުން 2017 ވަނަ އަހަރު ޗަައިނާގެ ކުންފުންޏަކާ ހަވާލު ކުރީ، އެ ތަން ހެދުމަަށް ނެގި ލޯނު ނުދެއްކޭތީ 99 އަހަރުގެ މުއްދަތަކަަށެވެ. މީގެ ކުރިން 2014 ވަނަ އަހަރު ވެސް ޗައިނާގެ ސަބްމެރީނެއް އަދި ހަނގުރާމަ މަތީ މަނަވަރެއް ކޮލޮމްބޯ ބަނދަރާ ކައިރިވުމަށް ހުއްދަ ދިނުމުން އިންޑިއާއިން ހިތްހަމަނުޖެހުނެވެ.
