ކޮވިޑް-19 ފެތުރެން ފެށީ ޗައިނާގެ ވޫހާންގައި ހުންނަ ހުއަނާން ސީފުޑް މާކެޓުން ކަމަށް "ގަބޫލު ކުރެވޭ ހެކި" އެބަ ހުރި ކަމަށް ސައިންސްވެރިން ބުނެފި އެވެ.
އަންގާރަ ދުވަހު ޝާއިއު ކުރި އާ ދެ ދިރާސާއެއްގައި ވަނީ ވޫހާންގައި ބަލި ފެތުރެން ފެށި ގޮތުގެ މައުލޫމާތު ހޯދައި އެނެލައިޒްކޮށްފަ އެވެ.
އެއް ދިރާސާގައި ބުނީ ކޮވިޑް ބަލީގެ އެންމެ ފުރަތަމަ ކޭސްތައް ގުޅިފައި ވަނީ އެ މާކެޓާ ކަމަށެވެ. ދެ ވަނަ ދިރާސާގައި ވަނީ ބަލި ފެތުރުނު ވަގުތު ޓްރެކް ކުރަން ޖެނެޓިކް މައުލޫމާތު ބޭނުންކޮށްފަ އެވެ.
ދެ ވަނަ ދިރާސާއިން ބުނީ ނޮވެމްބަރު ނުވަތަ ޑިސެމްބަރު 2019 ގައި އިންސާނުންގެ ތެރެއަށް ކޮރޯނާވައިރަސްގެ އާ ދެ ވޭރިއެންޓެއް ތައާރަފުވި ކަމަށެވެ.
އެ ދެ ދިރާސާ ހެދި ސައިންސްވެރިން ވެސް ބުނީ ހޯދުންތަކުން އެނގުނު ގޮތުގައި ކޮވިޑް ފަތުރާ ސާސް-ކޮވް-2 ވައިރަސް އިންސާނުންނާ ހަމައަށް ފޯރީ ހުއަނާން މާކެޓުގައި 2019 ވަނަ އަހަރުގެ ފަހުކޮޅު ވިއްކި ޖަނަވާރެއްގެ ފަރާތުންނެވެ.
ޖަނަވާރުގެ ފަރާތުން މާކެޓުގައި މަސައްކަތް ކުރި މީހުން ނުވަތަ ވިޔަަފާރި ކުރި މީހުންގެ ގަޔަށް ވެސް ވައިރަސް އަރާފައިވުން އެކަށީގެންވާ ކަމަށް ސައިންސްވެރިން ބުންޏެވެ.
ދިރާސާތަކުގައި އިސްކޮށް އުޅުނު ވައިރޮލޮޖިސްޓް ޕްރޮފެސަރު ޑޭވިޑް ރޮބަޓްސަން ބީބީސީއަށް ވިދާޅުވީ އެ ހޯދުންތަކާ އެކު ކޮވިޑަކީ ޗައިނާގެ ލެބަކުން ލީކުވި ވައިރަހެއް ކަމަށް ދެކެވޭ ވާހަކައަށް ހުއްޓުމެއް އައުމަށް އުއްމީދު ކުރައްވާ ކަމަށެވެ.
