ރަޝިއާއިން 2024 ވަނަ އަހަރު އިންޓަނޭޝަނަލް ސްޕޭސް ސްޓޭޝަން (އައިއެސްއެސް) އާ ވަކިވެ މުޅިން އާ ޖައްވީ ސްޓޭޝަނެއް ހަދާނެ ކަމަށް ބުނެފި އެވެ.
ރަޝިއާގެ ޖައްވީ އިދާރާ ރޮސްކޮސްމޯސްގެ އާ ވެރިޔާ ޔޫރީ ބޮރިސޯވް ވިދާޅުވީ 2024 ވަނަ އަހަރު އަައިއެސްއެސްއާ ވަަކިވުމާ ހަމައަށް ރަޝިއާގެ ޒިންމާތައް ފުރިހަމަ ކުރާނެ ކަމަށެވެ.
އެމެރިކާ އާއި ރަޝިއާ އަދި އެހެން ގައުމުތަައް ގުޅިގެން 1998 ވަނަ އަހަރުން ފެށިގެން ވަނީ ކާމިޔާބުކަމާ އެކު އައިއެސްއެސްގައި އެކުގައި މަސައްކަތްކޮށްފަ އެވެ.
އެކަމަކު މިދިޔަަ ފެބްރުއަރީ މަހު ރަޝިއާއިން ޔޫކްރެއިންގައި ހަނގުރާމަ ފެށުމުން ގުޅުންތައް ގޯސްވެ، އައިއެސްއެސްގައި ކުރާ މަސައްކަތަށް ވެސް ވަނީ ހުރަަސްއެޅިފަ އެވެ.
އައިއެސްއެސްއަަކީ ފަސް ގައުމެއްގެ ޖައްވީ އިދާރާ ގުޅިގެން ފެށި ޕްރޮޖެކްޓެކެވެ. އެ ސްޓޭޝަން ދުނިޔޭގެ އޯބިޓުގައި ދުނިޔެ ވަށާ ބުރު ޖަހަން ފެށީ 1998 ވަނަ އަހަރު އެވެ. އެއީ އެތަައް ހާސް ތަހުލީލުތަކާއި ދިރާސާތައް ކުރުމަށް މުހިއްމު ސްޓޭޝަނެކެވެ.
ކުރިން ވެސް ރާވާފައި އޮތޯ 2024 ވަނަ އަހަރާ ހަމައަށް އެ ސްޓޭޝަން ހިންގުމަށެވެ. އެކަމަކު އެމެރިކާއިން ބޭނުން ވަނީ އެހެން ގައުމުތަކުގެ ބައިވެރިވުމާ އެކު އިތުރު ހަ އަހަރަށް އެ ސްޓޭޝަން ހިންގުމަށެވެ.
ރަޝިއާގެ ނިންމުމާ ގުޅިގެން އައިއެސްއެސްގެ ކުރިމަގަށް ދެން ވާނެ ގޮތެއް ސާފެއް ނޫނެވެ. އެމެރިކާގެ ޖައްވީ އިދާރާ، ނާސާގެ އޮފިޝަލަކު ރޮއިޓާޒްއަށް ބުނީ ރަޝިއާގެ އެ ނިންމުން ރަސްމީކޮށް ހިއްސާކޮށްފައި ނުވާ ކަމަށެވެ.
