ދުނިޔޭގެ ގިނަ ގައުމުތަކެއްގައި ކުޑަކުދިންގެ ފުރަމޭ ފެއިލްވާ ބަލީގެ ހަގީގަތް ހޯދުމުގައި ކުރިއެރުން ލިބިފައިވާ ކަމަށް އިނގިރޭސިވިލާތުގެ ތަޖުރިބާކާރުން ބުނެފި އެވެ.
ތަހުގީތުތަކުން ދެއްކި ގޮތުގައި ކޮވިޑް ބަލިމަޑުކަމާ ގުޅިގެން ލޮކްޑައުން ކުރުމަށް ފަހު އަލުން ހުޅުވާލުމުން، ކުރިން ވެސް އާއްމުކޮށް ފެންނަ ދެ ބާވަތެއްގެ ވައިރަހުން ސީރިއަސް ހެޕަޓައިޓިސް ކޭސްތަކަށް މަގުފަހިވީ އެވެ.
ބެލެވޭ ގޮތުގައި 35 ގައުމެއްގެ 1000 އަަށް ވުރެ ގިނަ ކުދިންނަށް ހެޕަޓައިޓިސް ނުވަތަ ފުރަމޭއާ ގުޅުން ހުރި މައްސަލަތައް ވަނީ ކުރިމަތިވެފަ އެވެ. ގިނަ ކުދިންނަކީ ފަސް އަހަރުން ދަށުގެ ކުދިންނެވެ.
ބަައެއް ކުދިންގެ ހާލު ގޯސްވެ، ފުރަމޭ ޓްރާންސްޕްލާާންޓް ކުރަން ޖެހުނެވެ. އެގޮތުން އިނގިރޭސިވިލާތުގައި 12 ކުދިންގެ ފުރަމޭ ޓްރާންސްޕްލާންޓް ކުރި އެވެ.
އެ ބަލީގެ ހަގީގަތް ހޯދަން ލަންޑަނާއި ގްލާސްގޯގެ ތަޖުރިބާކާރުން ވަނީ އެކުގައި މަސައްކަތްކޮށްފަ އެވެ. އެ މީހުން ބުނީ ކޮވިޑް ލޮކްޑައުންއާ ހެދި ގިނަ ދުވަހު ގެއިން ނުނެރު ކުދިން ގެންގުޅެން ޖެހުމުން، ބައެއް ވައިރަސްތަަކަށް ކުދިން ހުށަހެޅުނީ އާއްމުކޮށް އެކަން ދިމާވާ އިރަށް ވުރެ ލަހުން ކަމަށެވެ. އޭގެ ސަބަބުން، ކުޑައިރު ވައިރަަސް ޖެހިއްޖެ ނަމަ ލިބޭ ގުދުރަތީ ރައްކާތެރިކަން އެ ކުދިންނަށް ނުލިބެ އެވެ.
އެގޮތަށް ފާހަގަވި އެއް ވައިރަހަކީ އާއްމު ރޯގާ އާއި ބޭރަށް ހިންގުން ފަދަ ކަންކަން ކުރިމަތި ކުރުވާ އެޑެނޯވައިރަހެވެ. އޭގެ އިތުރުން އެޑޭނޯ ވައިރަހާ ގުޅުން ހުރި ޓައިޕް ދޭއް ވެސް ފާހަގަކޮށްފައިވެ އެވެ.
އެ ވައިރަސްތައް ކުރިމަތިވާ ގިނަ ކުދިން އަވަހަށް ބަލިން ރަނގަޅުވި ނަމަވެސް، ބައެއް ހާލަތްތަަކުގައި ކުދިންގެ ހާލު ގޯސްވާން މެދުވެރިވީ "އިމިއުނިޓީ" ލިބިފަައި ނެތުމުން ކަމަށް ބެލެވެ އެވެ.
ބައެއް ކުދިންގެ ފުރަމޭއަށް ގެއްލުންވާ ހިސާބަށް ދާ ސަބަބު އަދިވެސް ޔަގީންކޮށް ބުނެދޭކަށް ނޭނގެ އެވެ. އެކަމަކު ބެލެވެނީ އެއީ ޖެނެޓިކްސްއާ ގުޅުން ހުރި ކަމެއްގެ ގޮތުގަ އެވެ.
މި ބައްޔާއި ކޮވިޑް ފަތުރާ ވައިރަސް ނުވަތަ ކޮވިޑް ވެކްސިންއާ އެއްވެސް ގުޅުމެއް ނުވާ ކަމަށް ސައިންސްވެރިން ބުނެ އެވެ.
