ދިވެހިރާއްޖޭގެ މިނިވަންކަމަށް ގައުމުގެ ހާރިޖީ ސިޔާސަތުގެ ދައުރު މުހިންމު ކަމަށާއި ސަރުކާރުން ގެންގުޅެނީ ގައުމުގެ މިނިވަންކަމަށް ފަހި، އެކަމަށް ލާބަލިބޭނެ ހާރިޖީ ސިޔާސަތެއް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ދިވެހިރާއްޖޭގެ 57 ވަނަ މިނިވަން ދުވަހުގެ މުނާސަބަތުގައި ގައުމާ މުހާތަބު ކުރައްވައި ވާހަކަ ދައްކަވަމުން ރައީސް ސޯލިހު ވިދާޅުވީ "މި ސަރުކާރުގެ ކޮންމެ ސިޔާސަތަކީ" ވެސް ރާއްޖޭގެ މިނިވަންކަމާއި ތަރައްގީ އާއި ކުރިއެރުމަށް ލާބަހުރި، ފަހި ސިޔާސަތުތަކެއް ކަމަށެވެ.
"ދިވެހި ދައުލަތް އޭގެ ކީރިތިކަމާ، މޫރިތި ކަމާއެކު ހިނގަމުން މިދަނީ، އަބަދުމެ ފުރިހަމަ މިނިވަންކަމާއެކު," ރައީސް ވިދާޅުވި އެވެ.
ސަރުކާރުގެ ހުރިހާ ސިޔާސަތަކުން ވެސް މިނިވަންކަމަށް ފަހިވާނެ ކަމަށް ރައީސް މި ވިދާޅުވީ، ރާއްޖޭގެ ހާރިޖީ ސިޔާސަތުގެ ސަބަބުން އަވައްޓެރި އިންޑިއާއަށް ބާރުތަކެއް ލިބި، ގައުމުގެ މިނިވަންކަން ގެއްލިދާނެ ކަމަށް ބުނެ އިދިކޮޅުން ފާޑުކިޔަމުންދާ ދަނޑިވަޅެއްގަ އެވެ.
ސަރުކާރުގެ ހާރިޖީ ސިޔާސަތާ ގުޅޭ ގޮތުން އިތުރަށް ވާހަކަ ދައްކަވަމުން ރައީސް ވިދާޅުވީ އެމަނިކުފާނުގެ ގެންގުޅުއްވާ ސިޔާސަތުގެ ސަބަބުން މިހާރު ބޭރު ދުނިޔޭގައި ރާއްޖެ ބަލައިގަނެފި ކަމަށެވެ.
"މިސަރުކާރުގެ ހާރިޖީ ސިޔާސަތަކީ، ދުނިޔެ ބަލައިގެންފައިވާ ތިލަފަތްހަމަ، ހަރުދަނާ ސިޔާސަތެއް. ގައުމުތަކާއެކު އޮންނަ ގުޅުންތައް، މިހާރު ބަދަހި. ބައިނަލްއަގްވާމީ މަސްރަހުގައި ރާއްޖެ އަދާކުރާ ދައުރު، މިކަންކަމަށް ހެކިވެދޭ،" ރައީސް ވިދާޅުވި އެވެ.
މިނިވަން ދުވަހުގެ ހިތާބު ދެއްވަމުން އޭގެ އިތުރަށް ރައީސް ސޯލިހު ވިދާޅުވީ "ދިވެހިރާއްޖެ، ރާއްޖޭގެ ގޮތުގައި ފުރާފުރިހަމަވި ސަބަބަކީ މުސްލިމް ދިވެހި ރައްޔިތުން" ކަމަށާއި މިނިވަންކަން އަސްލަކީ ވެސް އިސްލާމް ދީން ކަމަށެވެ.
"ދިވެހިރާއްޖޭގެ މިނިވަންކަމާ، ސިޔާދަތާ، އިސްތިގްލާލް އެކީ، އެއްމާރަކުން ބަނދެވިގެންވާ، ހަގީގީ ސިއްރަކީ މާތްވެގެންވާ އިސްލާމްދީން. އެދީނުގެ ރިސާލަތާ، ހިދާޔަތުން ދިވެހި އުންމަތް އެކުއެކީ، އަލިވެ އުޖާލާވެގެން ދިއުމަކީ ދެދުނިޔޭގައި ވެސް ރާއްޖެއަށް ލިބޭނެ އެންމެ ބޮޑު ނަސީބާ ރަހްމަތް،" ރައީސް ސޯލިހު ވިދާޅުވި އެވެ. "ދުނިޔޭގެ އަރި، ހުރަހަށް ހިނގާ ތަފާތު ފިކުރީ އޮއިވަރުން ނެއްޓި، މިނިވަން ގައުމެއްގެ ގޮތުގައި ދެމިއޮތުން އަބަދުވެސް އަޅުގަނޑުމެންނަށް ލާޒިމް."
ރައީސް ވިދާޅުވީ އެމަނިކުފާނުގެ އެންމެ އިސް ވާޖިބަކީ "މިގައުމުގެ އަމިއްލަ ވެރިކަމާ މިނިވަންކަން" ދެމެހެއްޓުން ކަމަށާއި ރައްޔިތުންގެ ސަލަމާތާއި ރައްކާތެރިކަން ކަށަވަރުކޮށްދިނުމަށް ސިފައިންނާއި ފުލުހުން "ރެޔާ ދުވާލު، ކެނޑިނޭޅި" މަސައްކަތް ކުރަމުންދާ ކަމަށެވެ.
"އެ ބޭފުޅުންގެ މުގައްދަސް ގައުމީ ވާޖިބު އަދާކުރެއްވުމުގާ، ހިމަ ނަރެއްގެ ޖާގަ ދެއްވުމަށް ވެސް، ތައްޔާރެއް ނޫން. އަދި އެންމެ އެސްފިޔައެއް ޖަހާލާނެހާ ވަގުތު ކޮޅެއް ވެސް، އެބޭފުޅުން އިސްރާފެއް ނުކުރައްވާ. ނަތީޖާއަކީ، އެއިރު ވެސް، މިހާރު ވެސް އަދި އިރާދަކުރެއްވިއްޔާ ތާއަބަދަށް ވެސް، މިނިވަން ދިވެހިރާއްޖެ، މިނިވަންކަމުގައި ދެމިއޮތުން،" އެމަނިކުފާނު ވިދާޅުވި އެވެ.
މިއަދު ގައުމާ މުހާތަބު ކުރައްވާ ވާހަކަ ދައްކަވަމުން ރައީސް ސޯލިހު ވަނީ ރާއްޖޭގެ އިގްތިސާދީ ހާލަތާ ގުޅޭ ގޮތުން ވެސް ވާހަކަ ދައްކަވައިފަ އެވެ. އެގޮތުން ޔޫރަޕުގައި މިހާރު ކުރިއަށްދާ ހަނގުރާމައިގެ ސަބަބުން ތެލަށް ބާރުބޮޑުވެ، ސަރުކާރުގެ ހަރަދުބަރަދު ކުޑަކުރަންޖެހިފައިވާ ކަމަށް ވިދާޅުވި އެވެ. އަދި ކޮވިޑް-19 ގެ ކުރިން އޮތް ހިސާބަށް އިގްތިސާދު މިއަހަރު ނިމޭއިރު ގެންދެވޭނެ ކަމަށާއި ނަމަވެސް "ކާމިޔާބީގެ ހެޔޮ އަސަރު، އެންމެ ރަނގަޅަށް ރައްޔިތުންނަށް ފޯރުކޮށްދިނުމަށް، ހުރަސްތަކެއް އެބަހުރި" ކަމަށެވެ.
