ޔޫކްރެއިންގައި ތާށިވެފައި ހުރި ގޮދަން އެކްސްޕޯޓް ކުރެވޭނެ ގޮތެއް މަގުފަހި ކުރުމަށް ޔޫކްރެއިނާއި ރަޝިއާއިން އެއްބަސްވުމުގައި ސޮއިކުރިތާ އެއް ދުވަަސް ވެސް ނުވަނީސް އޮޑެއްސާ ބަނދަރަށް ހަމަލާތަކެއް ދީފި އެވެ.
ޔޫކްރެއިން ސިފައިން ބުނީ ހޮނިހިރު ދުވަހު އޮޑެއްސާ ސިޓީއަށް ދެ މިސައިލް ހަމަލާ އަމާޒުވި ކަމަށެވެ.
ހުކުރު ދުވަހު ސޮއިކުރި އެއްބަސްވުމުގެ ދަށުން، ރަޝިއާއިން ބުނީ ގޮދަނުގެ ޝިޕްމަންޓް އެކްސްޕޯޓް ކުރުމުގެ މަސައްކަތް ކުރިއަށްދާ އިރު ބަނދަރުތަކަށް އަމާޒު ނުކުރާނެ ކަމަށެވެ.
ތުރުކީގެ ޑިފެންސް މިނިސްޓަރު، ރަޝިއާގެ އޮފިޝަލުންނާ ހަވާލަދީ ވިދާޅުވީ އޮޑެއްސާއަށް ދިން ހަމަލާތަކުގެ ފަހަތުގައި އޮތީ ރަޝިއާ ނޫން ކަމަށެވެ.
އީޔޫގެ ފޮރިން އެފެއާޒް ޗީފް ޖޯސެޕް ބޮރެލް ވިދާޅުވީ އެ ހަމަލާތަަކުން އެނގެނީ ބައިނަލްއަގްވާމީ ގާނޫނަށް ރަޝިއާއިން އެއްވެސް ވަރަކަށް އިހްތިރާމް ނުކުރާކަން ކަމަށެވެ.
އދ. ގެ ސެކެޓްރީ ޖެނެރަަލް އެންޓޯނިއޯ ގުޓެރޭޒް ހަމަލާ ކުށްވެރި ކުރައްވައި ވިދާޅުވީ ގޮދަން އެކްސްޕޯޓް ކުރުމާ ގުޅޭ އެއްބަސްވުން ތަންފީޒު ކުރުން ކޮންމެހެން ވެސް މުހިއްމު ކަމަށެވެ.
ރަޝިއާއިން މިދިޔަ ފެބްރުއަރީ މަހު ޔޫކްރެއިންގައި ހަަނގުރާމަ ފެށުމުން، ޔޫކްރެއިންގެ ބަނދަރުތަކުން ގޮދަން އެކްސްޕޯޓް ކުރުން މެދުކެނޑި، އެތައް މިލިއަން ޓަނެއް ސަޕްލައި ތާށިވި އެވެ.
އޭގެ ސަބަބުން އެތައް މިލިއަން ބަޔަކު ބަނޑުހައި ހޫނު ކަމަށް ވެއްޓި، ދުނިޔޭގެ ބާޒާރުގައި ކާބޯތަކެތީގެ އަގު އުފުލެން ފެށުމުގެ މައްސަލަ އޮތީ ކުރިމަތިވެފަ އެވެ.
އެ މައްސަލަަ ހައްލު ކުރުމަށް ގޮދަން އެކްސްޕޯޓް ކުރުމާ ގުޅޭ އެއްބަސްވުމަކާ ހަމައަށް ދިޔުމަށް ދެ މަސް ވަންދެން މަޝްވަރާ ކުރި އެވެ. އެއްބަސްވުމަށް އަމަލު ކުރަމުން ދާނީ 120 ދުވަހުގެ މުއްދަތަކަށެވެ. ދެ ފަރާތުން އެއްބަސްވެއްޖެ ނަމަ މުއްދަތު އިތުރު ކުރެވޭނެ އެވެ.
ތުރުކީގެ އިސްތަންބޫލުގައި އެއްބަސްވުމުގައި ސޮއިކުރުމަށް ބޭއްވި ރަސްމިއްޔާަތުގައި ދެ ގައުމުން ބައިވެރިވި އެވެ. ނަމަވެސް, ދެ ގައުމުގެ އޮފިޝަލުން އެއް މޭޒެއް ކައިރީގައި ތިބެން ވެސް ދެކޮޅު ހެދި އެވެ.
ރަޝިއާއާ އެކު ސީދާ އެއްބަސްވުމެއްގައި ސޮއިކުރަން ވެސް ޔޫކްރެއިނުން ދެކޮޅު ހެދި އެވެ. އެހެންވެ، ދެ ގައުމުން ސޮއިކުރީ ވަކި ދެ އެއްބަސްވުމުގަ އެވެ. ޔޫކްރެއިނުން ބުނީ އެއްބަސްވި ކަންކަމާ ހިލާފުވެއްޖެ ނަމަ ވަގުތުން އަސްކަރީ ރައްދެއް ދޭނެ ކަމަށެވެ.
ޔޫކްރެއިންގެ ގޮދަން އެކްސްޕޯޓް ކުރާ ގޮތް ބެލުމަށް އިސްތަންބޫލްގައި ކޯޑިނޭޝަން އަދި މޮނިޓަރިން ސެންޓަރެއް ހުޅުވާނެ އެވެ. އެ ތަނުގައި މަސައްކަތް ކުރާނީ އދ.، ތުރުކީ، ރަޝިއާ އަދި ޔޫކްރެއިންގެ އޮފިޝަލުންނެވެ.
