ޔޫކްރެއިންގައި ތާށިވެފައި ހުރި ގޮދަނުގެ ޝިޕްމަންޓް ބްލެކް ސީ ރޫޓުން އެކްސްޕޯޓް ކުރުމަަށް މަގުފަހިވާ އެއްބަސްވުމެއްގައި ރަޝިއާ އާއި ޔޫކްރެއިނުން ސޮއިކޮށްފި އެވެ.
ރަޝިއާއިން މިދިޔަ ފެބްރުއަރީ މަހު ޔޫކްރެއިންގައި ހަަނގުރާމަ ފެށުމުން، ޔޫކްރެއިންގެ ބަނދަރުތަކުން ގޮދަން އެކްސްޕޯޓް ކުރުން މެދުކެނޑި، އެތައް މިލިއަން ޓަނެއް ސަޕްލައި ތާށިވި އެވެ.
އޭގެ ސަބަބުން އެތައް މިލިއަން ބަޔަކު ބަނޑުހައި ހޫނު ކަމަށް ވެއްޓި، ދުނިޔޭގެ ބާޒާރުގައި ކާބޯތަކެތީގެ އަގު އުފުލެން ފެށުމުގެ މައްސަލަ އޮތީ ކުރިމަތިވެފަ އެވެ.
އެހެން ނަމަވެސް ރަޝިއާއާ އެކު ސީދާ އެއްބަސްވުމެއްގައި ސޮއިކުރަން ޔޫކްރެއިނުން ދެކޮޅު ހެދި އެވެ. ޔޫކްރެއިނުން ބުނީ އެއްބަސްވި ކަންކަމާ ހިލާފުވެއްޖެ ނަމަ ވަގުތުން އަސްކަރީ ރައްދެއް ދޭނެ ކަމަށެވެ.
ތުރުކީގެ އިސްތަންބޫލުގައި އެއްބަސްވުމުގައި ސޮއިކުރުމަށް ބޭއްވި ރަސްމިއްޔާަތުގައި ދެ ގައުމުން ބައިވެރިވި އެވެ. ނަމަވެސް, ދެ ގައުމުގެ އޮފިޝަލުން އެއް މޭޒެއް ކައިރީގައި ތިބެން ވެސް ދެކޮޅު ހެދި އެވެ.
titledesc
ގޮދަން އެކްސްޕޯޓް ކުރުމާ ގުޅޭ ވަކި ދެ އެއްބަސްވުމުގައި ދެ ގައުމުން ސޮއި ކުރި އިރު، ރަޝިއާގެ އެއްބަަސްވުމުގައި ސޮއިކުރެއްވީ ޑިފެންސް މިނިސްޓަރު ސާގެއި ޝޮއިގޫ އެވެ. އަދި ޔޫކްރެއިން އެއްބަސްވުމުގައި ސޮއިކުރެއްވީ އިންފްރާސްޓްރަކްޗާ މިނިސްޓަރު އޮލެކްސެންޑަރް ކުބްރަކޯވް އެވެ.
އެއްބަސްވުމަކާ ހަމައަށް އާދެވުނީ ދެ މަސް ވަންދެން ކުރި މަޝްވަރާއަށް ފަހު އެވެ. އެއްބަސްވުމަށް އަމަލު ކުރަމުން ދާނީ 120 ދުވަހުގެ މުއްދަތަކަށެވެ. ދެ ފަރާތުން އެއްބަސްވެއްޖެ ނަމަ މުއްދަތު އިތުރު ކުރެވޭނެ އެވެ.
ޔޫކްރެއިންގެ ގޮދަން އެކްސްޕޯޓް ކުރާ ގޮތް ބެލުމަށް އިސްތަންބޫލްގައި ކޯޑިނޭޝަން އަދި މޮނިޓަރިން ސެންޓަރެއް ހުޅުވާނެ އެވެ. އެ ތަނުގައި މަސައްކަތް ކުރާނީ އދ.، ތުރުކީ، ރަޝިއާ އަދި ޔޫކްރެއިންގެ އޮފިޝަލުންނެވެ.
