ޔޫކަރެއިންގެ ރައިގާ ގައި ހުންނަ ޔޫކްރޭނިއަން ސަޕޯޓް ސެންޓަރަށް, އދ. ގެ އާންމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރު އަބްދުﷲ ޝާހިދު ޒިޔާރަތް ކުރައްވައިފި އެވެ.
ރަޝިޔާ އިން ޔޫކްރޭނާ ދެކޮޅަށް ހަނގުރާމަ ފެށި ފަހުން މިހާތަނަށް
ޝާހިދު ކުރެއްވި ޓްވީޓެއްގައި ވަނީ ހަނގުރާމާގައި ހާލުގައި ޖެހިފައިވާ މީހުންނަށް އެހީވަމުންދާ ފަރާތްތަކުން ކުރަމުން އަންނަ މަސައްކަތް ފާހަގަކޮށް އެ ފަރާތްތަކަށް ހިއްވަރު ދެއްވާފަ އެވެ.
އެ ސެންޓަރުން ދޭ ހިދުމަތްތަކުގެ ތެރޭގައި ޔޫކްރޭންގައި މިހާރު ހިނގަމުންދާ ހަނގުރާމައާ ގުޅިގެން ހާލުގައި ޖެހޭ މީހުންނަށް އެކި ކަހަލަ އެހީ ފޯރުކޮށްދިނުމާއި މައުލޫމާތާއި ހޭލުންތެރިކަން އިތުރުކޮށްދިނުން ހިމެނެ އެވެ.
ރަޝިޔާއިން ފެބުރުއަރީ 24 ގައި ޔޫކްރެއިނަށް އަރައި ފަށާފައިވާ މި ހަނގުރާމައަކީ، 1991 ވަނަ އަހަރު ކުރީގެ ރޫސީ ވިލާތް ރޫޅުމުން މޮސްކޯގެ އަތްދަށުން މިނިވަންވި ގައުމުތައް އަލުން ހިފުމުގެ މަގުސަދުގައި ފަށާފައިވާ ހަނގުރާމައެއްގެ ގޮތުގައި ޔޫކްރެއިނުގެ އިތުރުން ހުޅަނގުގެ ގައުމުތަކުން ވެސް ދެކެ އެވެ.
ހަނގުރާމައިގައި ރަޝިއާއަށް ފުރަތަމަ ކޮޅު މާބޮޑު ކުރިއެރުމެއް ނުލިބުނު ނަމަވެސް ފަހުން އިރުމަތީ ޔުކްރެއިންގެ ބޮޑުބައެއް ރަޝިއާއިން ވަނީ ހިފައިފަ އެވެ. އަދި ޔުކްރެއިންގެ ރައްޔިތުންނަށް ރަޝިއާގެ ރައްޔިތުކަން ވެސް ވަނީ ދޭން ފަށައިފަ އެވެ.
ޔޫކެރޭންގެ ހަނގުރާމައިގައި މިދިޔަ މަހުގެ ނިޔަލަށް 4000 އަށްވުރެ ގިނަ އާންމުން މަރުވެފައިވާއިރު 6000 އަށްވުރެ ގިނަ މީހުންނަށް އަންނަނީ ފަރުވާދެމުން ކަމަށް އެ ގައުމުގެ ނޫސްތަކުން ބުނެ އެވެ.
