މަތީ ތައުލީމު ދޭ ބައެއް މަރުކަޒުތަކުން ޕްރޮގްރާމްތައް ހިންގުމަށް ހުއްދަ ދީފައިވާ ގޮތާ ހިލާފަށް ހިންގަމުންދާތީ އެފަދަ މަރުކަޒުތަކާމެދު ފިޔަވަޅުއަޅާނެ ކަމުގެ އިންޒާރު މޯލްޑިވްސް ކޮލިފިކޭޝަން އޮތޯރިޓީ (އެމްކިޔުއޭ) އިން ދީފި އެވެ.
އެފަދަ ތަންތަނަށް އިންޒާރުދީފައި ވަނީ ހިންގުމުގެ ހުއްދަ ދީފައިވާ ބައެއް ޕްރޮގްރާމްތައް ހިންގުމުގައި، ހުއްދަ ދީފައިވާ މިންގަނޑުތަކާއި ޕްރޮގްރާމް އެކްރެޑިޓޭޝަން ގަވާއިދާ ހިލާފަށް ބައެއް މަރުކަޒުތަކުން އަމަލު ކުރަމުންދާ ކަމަށް އާންމު ފަރާތްތަކުން އެ އޮތޯރިޓީއަށް ޝަކުވާ ހުށަހަޅަމުންދާތީ އެވެ.
އެމްކިޔުއޭއިން ބުނީ އީ-ލާނިން ޑެލިވަރީ މޮޑަލިޓީގައި ހިންގުމުގެ ހުއްދަ ދީފައިނުވާ ޕްރޮގްރާމްތައް ހިންގާ ކަން ފާހަގަ ކުރެވިފައިވާ ކަމަށެވެ.
"މިފަދަ ޕްރޮގްރާމްތައް އިޝްތިހާރު ކުރަމުންދާކަން ފާހަގަކުރެވިފައިވޭ. އެފަދަ އަމަލުތައް ފާހަގަވުމުން އެ މައްސަލަ ބަލައި ރާއްޖޭގެ މަތީ ތައުލީމާއި ތަމްރީނުގެ ގާނޫނާއި ޕްރޮގްރާމް އެކްރެޑިޓޭޝަން ގަވާއިދާ އެއްގޮތަށް ފިޔަވަޅު އަޅަމުންދާނެ،" އެމްކިޔުއޭއިން ބުންޏެވެ.
އަދި އެއީ "ޕްރޮގްރާމް އެކްރެޑިޓޭޝަން ގަވާއިދު"އާ ހިލާފު އަމަލެއް ކަމަށާއި ޕްރޮގްރާމް އެކްރެޑިޓޭޝަން ގަވާއިދާ ހިލާފަށް ހިންގާ ޕްރޮގްރާމްތައް އެމްކިޔުއޭއިން ބަލައި ނުގަންނާނެ ކަމަށްވެސް އެމްކިޔުއޭއިން ބުންޏެވެ.
