ސަރުކާރުގެ އަމާޒަކީ ރާއްޖެއާއި ރާއްޖޭން ބޭރުން ތައުލީމާއި ހުނަރު ލިބިގަތުމުގެ ގިނަ ފުރުސަތުތަކެއް ދިވެހި ދަރިވަރުންނަށް ފަސޭހަކަމާއެކު ހޯދައިދިނުން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް މިރޭ ވިދާޅުވެއްޖެ އެވެ.
ރައީސުލްޖުމްހޫރިއްޔާގެ ހާއްސަ ސްކޮލާޝިޕްއާއި ހައި އެޗީވާސް ސްކޮލާޝިޕް ލިބޭ ދަރިވަރުންނަށް ސްކޮލާޝިޕް ހަވާލު ކުރުމަށް ބޭއްވި ރަސްމިއްޔާތުގައި ރައީސް ސޯލިހް ވިދާޅުވީ ސަރުކާރުން އެންމެ އިސްކަމެއް ދެވޭ ކަމަކަށް އޮތީ ތައުލީމީ ހުނަރުވެރި ޖީލެއް ބިނާ ކުރުން ކަމަށެވެ.
"ސަރުކާރުގެ އަމާޒަކީ ރާއްޖެއާއި ރާއްޖެއިން ބޭރުން ތަޢުލީމާއި ހުނަރު ލިބިގަތުމުގެ ގިނަ ފުރުޞަތުތަކެއް ދިވެހި ދަރިވަރުންނަށް ފަސޭހަކަމާއެކު ހޯދައިދިނުން." ރައީސް ސޯލިހް ވިދާޅުވި އެވެ.
މި ފުރުސަތުތައް އިތުރު ކުރުމަށް ޓަކައި ސަރުކާރުން މިހާތަނަށް ކުރެވިފައިވާ މަސައްކަތްތައް ވެސް ރައީސް ފާހަގަ ކުރެއްވި އެވެ.
ރާއްޖޭގައި ދަރިވަރުން މަދު ރަށްރަށުގައި ސެޓެލައިޓް ސްކޫލްތައް ގާއިމްކޮށް އެއްވެސް ރަށެއް ތަފާތު ކުރުމެއް ނެތި އެ ރަށެއްގައި ތިބެގެން އިބްތިދާއީ ތައުލީމު ހޯދުމުގެ ފުރުސަތު ގާއިމް ކުރެވިފައިވާ ކަމަށް ރައީސް ފާހަގަ ކުރެއްވި އެވެ. އަދި ފަހުން އިތުރު ރަށްރަށުގައި ސާނަވީ އަދި މަތީ ސަނާވީ ތައުލީމު ފެށިފައިވާ ކަން ވެސް ރައީސް ފާހަގަ ކުރެއްވި އެވެ.
ފުރަތަމަ ޑިގްރީ ހިލޭ ފޯރުކޮށްދިނުމުގެ ސިޔާސަތާއި ސްޓޫޑެންޓް ލޯނުގެ އިންޓްރެސްޓް ތިން އިންސައްތައަށް ކުޑަކުރުމުން އިތުރު ދަރިވަރުންނަށް އެ ފުރުސަތުތައް ލިބިގެން ގޮސްފައިވާ ކަމަށް ރައީސް ވިދާޅުވި އެވެ.
މީގެ އިތުރުން، ރަށްރަށުގައި ޓިވެޓް ސެންޓަރުތަކާއި ޖޫނިއާ ކޮލެޖްތައް ގާއިމް ކުރުމުގެ މަސައްކަތް ފެށިފައިވާއިރު އެ މަރުކަޒުތައް މެދުވެރިކޮށް ޒުވާނުންނަށް އިތުރު ހުނަރުތައް ދަސްކޮށްދިނުމުގެ އިތުރު ފުރުސަތުތަކެއް ގާއިމްވެގެން ދާނެ ކަމަށް ރައީސް ވިދާޅުވި އެވެ.
"ސިޔާސަތަށް ގެނުވުނު ބަދަލާ އެއްގޮތަށް ކުރެވޭ މަސައްކަތާއި އަދި މިކުރެވޭ ހޭދައިގެ ނަތީޖާ ފެންނަނީ ވަރަށް އުޖާލާކޮށް، އެއް ކަމަކީ އެއް އަހަރުން އަނެއް އަހަރަށް ހައި އެޗީވާސް ސްކޮލާޝިޕް ހާސިލުކުރާ ދަރިވަރުންގެ ޢަދަދު އިތުރުވަމުން އައުން،" ރައީސް ވިދާޅުވި އެވެ.
ރައީސުލްޖުމްހޫރިއްޔާ ދެއްވާ ހާއްސަ ސްކޮލާޝިޕް މިރޭ ހާސިލް ކުރީ ހަ ދަރިވަރުންނަކީ ވެސް އަންހެން ދަރިވަރުންނެވެ. އެއީ މާލެ ސިޓީގެ ސީ.އެޗް.އެސް.އީގެ ފަސް ދަރިވަރަކާއި، ހދ. ކުޅުދުއްފުށީ ސިޓީގެ ޖަލާލުއްދީން ސްކޫލްގެ ދަރިވަރެކެވެ.
ރައީސް ވަނީ އެ ދަރިވަރުންނަށް ބައެއް ކަންކަމަށް އިލްތިމާސް ކުރައްވައިފަ އެވެ. އެ ގޮތުން، އިގްތިސޯދީ މައްސަލަތަކާއި ސިއްހީ ކާރިސާތަކާއި ތިމާވެށީގެ އަސަރުތަކާއި ދީނީ ގޮތުން ފަތުރަމުންދާ ނުރަނގަޅު ފިކުރުތަކަށް ދަރިވަރުން ސަމާލުވެ ތިބުމަށް ރައީސް އިލްތިމާސް ކުރެއްވި އެވެ.
