ޔޫކްރެއިންގެ ސެކިއުރިޓީ އެޖެންސީ (އެސްބީޔޫ) ގެ ވެރިޔާ އަދި ޕްރޮސެކިއުޓާ ޖެނެރަލް މަގާމުން ވަކިކުރަން އެ ގައުމުގެ ރައީސް ވޮލޮޑިމިރް ޒެލެންސްކީ ނިންމަވައިފި އެވެ.
އެގޮތަށް ނިންމެވީ އެސްބީޔޫ އާއި ޕީޖީ އޮފީހުގެ ތެރޭގައި ގައުމަށް ހިޔާނާތްތެރިވެ، ގައްދާރުވުމުގެ ގިނަ މައްސަލަތަކެއް ފެންމަތިވުމުން ކަމަށް ޒެލެންސްކީ ވިދާޅުވި އެވެ.
އެމަނިކުފާނު ވިދާޅުވީ އެ ދެ އިދާރާއިގެ 60 އަށް ވުރެ ގިނަ މުވައްޒަފުން މިހާރު މަސައްކަތް ކުރަނީ ޔޫކްރެއިންއާ ދެކޮޅަށް ކަމަށެވެ. އެ މުވައްޒަފުން ވަޒީފާއިން ވަކިކޮށްފައިވާ އިރު، އެ މީހުން ތިބީ ރަޝިއާގެ ކޮންޓްރޯލްގެ ދަށުގައިވާ ސަރަހައްދުގަ އެވެ.
ޒެލެންސްކީ ވިދާޅުވީ ރަޝިއާއާ ގުޅިގެން މަސައްކަތް ކުރުމާއި ގައްދާރުވުމުގެ 651 މައްސަލައިގައި ގާނޫނު ތަންފީޒް ކުރާ އޮފިޝަަލުން ހިމެނޭ ކަމަށެވެ.
މަގާމުން ވަކިކުރި އައިވން ބަކަނޯވް އަދި އައިރީނާ ވެނެޑިކްޓޯވާ މިހާތަނަށް ވަކި އެއްޗެއް ނުބުނެ އެވެ.
