ސްރީ ލަންކާގެ ރައީސް ގޮތަބަޔާ ރާޖަޕަކްސަގެ އިސްތިއުފާ އެ ގައުމުގެ މަޖިލީހުގެ ރައީސް މަހިންދަޔަޕާ އަބޭވަރްދަނާ ރަސްމީކޮށް އިއުލާން ކުރައްވައިފި އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި މަހިންދަޔަޕާ ވިދާޅުވި ގޮތުގައި ގޮތަބަޔާ ވަނީ ގާނޫނީ ހަމަތަކުގެ މަތިން އިއްޔެއިން ފެށިގެން ރައީސް ކަމުގެ މަގާމުން އިސްތިއުފާ ދެއްވާފަ އެވެ. އަދި, އޭނާގެ އެ އިސްތިއުފާ ގަބޫލުކުރައްވާފައިވާ ކަމަށް ވެސް ވިދާޅުވި އެވެ.
ގޮތަބަޔާ އިސްތިއުފާ ދެއްވާފައިވުމާއެކު, ވަގުތީ ގޮތުން ރައީސް ކަމާ ހަވާލުވެވަޑައިގަންނަވަނީ ބޮޑު ވަޒީރު ރަނިލް ވިކެރަމަސިންހާ އެވެ. އިސްތިއުފާ ދެއްވުމުގެ ކުރިން ލަންކާއިން ރާއްޖެއަށް ސިއްރިއްޔާތުގައި ވަޑައިގެން ރައީސްގެ މަސްއޫލިއްޔަތު ވެސް ގޮތަބަޔާ, ރަނިލްއާ ހަވާލު ކުރެއްވި އެވެ.
ލަންކާގެ ގާނޫނުއަސާސީ އޮންނަ ގޮތުން, ރައީސްއަކު ދައުރުގެ މެދު ތެރޭން އިސްތިއުފާ ދެއްވައިފިނަމަ, ދެން ރައީސްއަކު އިންތިހާބު ކުރަން ޖެހޭނީ ގާނޫނު ހަދާ މަޖިލީހުގެ މެންބަރުންގެ ތެރޭންނެވެ. އެކަން ފެށުމުގެ ގޮތުން ގާނޫނު ހަދާ މަޖިލީހުގެ ޖަލްސާއެއް މާދަމާއަށް ވަނީ ތާވަލުކޮށްފަ އެވެ.
މަޖިލީހުގެ ރައީސް ވިދާޅުވި ގޮތުގައި, ކުރިއަށް އޮތް ހަތް ދުވަހުގެ ތެރޭ ރައީސްއަކު ހޮވުމުގެ ކަންކަން ނިމިގެން ދާނެ އެވެ.
ލަންކާގެ ސިޔާސީ ލީޑަރުން އެއްބަސްވެފައިވަނީ, އަދި ރައްޔިތުންގެ ޑިމާންޑަކީ ވެސް އެއްބައިވަންތަ ކަމުގެ ސަރުކާރެއް ގާއިމްކުރުމެވެ. އެކަމަށްޓަކައި ރަނިލްގެ އިސްތިއުފާއަށް ވެސް ރައްޔިތުން އަންނަނީ ޑިމާންޑް ކުރަމުންނެވެ. ނަމަވެސް, އިސްތިއުފާ ދެއްވާނެ ކަމުގެ އިޝާރާތެއް ރަނިލް އަދި ނުކުރައްވަ އެވެ.
މިވަގުތު ސިންގަޕޫރުގައި ހުންނެވި ގޮތަބަޔާ އިސްތިއުފާ ދެއްވާފައި މި ވަނީ ބުދަ ދުވަހުގެ މެންދުރު އިސްތިއުފާ ދެއްވާނެ ކަމަށް ކުރިން ވިދާޅުވެފައި އޮއްވަ އެވެ. އަދި ފަހުން ރާއްޖޭގައި ހުންނަވައި ގާނޫނު ހަދާ މަޖިލީހުގެ ރައީސަށް ގުޅުއްވައި ރޭ ދަންވަރު 12:00 ޖެހުމުގެ ކުރިން އިސްތިއުފާ ދެއްވާނެ ކަމަށް ވެސް ވިދާޅުވެފައިވެ އެވެ.
ގޮތަބަޔާ އިސްތިއުފާ ދެއްވާފައި މި ވަނީ އަންގާރަ ދުވަހުގެ ދަންވަރު 2:50 ގައި ލަންކާ އެއާފޯސްގެ އަސްކަރީ އުޅަނދެއްގައި ރާއްޖެ ވަޑައިގެން 32 ގަޑިއިރު ރާއްޖޭގައި ހޭދަ ކުރެއްވުމަށްފަހު ސިންގަޕޫރަށް ވަޑައިގެންނެވިތާ މާ ގިނަ އިރުތަކެއް ނުވަނީހެވެ.
ގޮތަބަޔާ އިސްތިއުފާ ދެއްވިތާ ކުޑަ ވަގުތުކޮޅެއް ފަހުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ ލަންކާގެ ރައީސް އެ ގައުމުގައި ތާށިވެ، ފުރާނަފުޅަށް ގެއްލުންވާނެ ކަމަށް ބެލެވޭ ހާލަތެއްގައި ހުންނެވި ނަމަ އަދިވެސް އިސްތިއުފާ ނުދެއްވީސް ކަމަށެވެ.
"[މިކަމުގައި] ދިވެހި ސަރުކާރުން ވިސްނުންތެރިކަމާއެކު އެޅި ފިޔަވަޅުތަކަށް އަޅުގަނޑު ސާބަސް ދެން. އަޅުގަނޑުގެ ހެޔޮ ދުއާ ސްރީ ލަންކާގެ ރައްޔިތުންނަށް،" ނަޝީދު މިރޭ 7:06 ގައި އިނގިރޭސިން ލިޔުއްވި ޓުވީޓެއްގައި ވިދާޅުވި އެވެ.
ގޮތަބަޔާ ރާއްޖެ ވަޑައިގެންނެވީ ލަންކާގެ ރައްޔިތުން އެމަނިކުފާނުގެ ގެކޮޅަށް ވަދެގަތުމުގެ ކުޑަ އިރުކޮޅެއް ކުރިން ފިއްލެވުމަށްފަހު އެވެ. އެންމެ ފުރަތަމަ އެމަނިކުފާނު މަސައްކަތް ކުރެއްވީ ޑުބާއީއަށް ވަޑައިގަތުމަށެވެ. ނަމަވެސް ވީއައިޕީން ވަޑައިގަތުމަށް ލަންކާގެ އިމިގްރޭޝަނުން ހުއްދަ ނުދިނުމުން، އަސްކަރީ އުޅަނދެއްގައި ރާއްޖެ ވަޑައިގަތީ އެވެ.
އަނބިކަނބަލުންނާއި ދެ ބޮޑީގާޑުންނާއެކު ރާއްޖެ ވަޑައިގެންނެވި ދެ އިންޖީނުލީ އެންޓެނޮވް-32 މަރުކާގެ ބޯޓުގައި އެމަނިކުފާނު ރާއްޖެ ގެންނެވުމަށް ސްރީ ލަންކާގެ އެއާފޯސްއަށް އަމުރު ކުރެއްވީ ހުދު އެމަނިކުފާނަށް ލިބިވަޑައިގެންފައިވާ ރިޔާސީ ބާރުގެ ދަށުންނެވެ.
