އިގްތިސާދީ ކާރިސާއެއްގެ ސަބަބުން ސިޔާސީ ހަލަބޮލިކަމުގެ ތެރެއަށް ވެއްޓިފައިވާ އަވަށްޓެރި ސްރީލަންކާއަށް އާ ރައީސަކު އިންތިހާބު ކުރުމަށް ޖުލައި 20 ގައި އެގައުމުގެ މަޖިލީހުގައި ވޯޓެއް ނެގުމަށް ތާވަލުކޮށްފި އެވެ.
އެގައުމުގެ ރައީސް ގޮތަބަޔާ ރާޖަޕަކްސާ އަދި ބޮޑުވަޒީރު ރަނިލް ވިކްރަމްސިންހަ އިސްތިއުފާ ދިނުމަށް ގޮވާލައި ރައްޔިތުން އަންނަނީ ބޮޑު މުޒާހަރާތަކެއް ކުރަމުންނެވެ. އެ މުޒާހަރާތަކުގެ ތެރެއިން ރިޔާސީ ގަނޑުވަރާއި ބޮޑުވަޒީރުގެ ގެކޮޅަށް ވެސް ވަނީ ވަދެގަނެފަ އެވެ. އެއާއެކު، އެ ދެ ބޭފުޅުން ވެސް ވަނީ އިސްތިއުފާ ދެއްވާނެ ކަމަށް ވިދާޅުވެފަ އެވެ.
އެގޮތުން، މާދަމާ އިސްތިއުފާ ދެއްވާނެ ކަމަށް ރައީސް ގޮތަބަޔާ ވަނީ އަންގަވާފަ އެވެ. އަދި، ގައުމީ އެއްބައިވަންތަކަމުގެ ސަރުކާރެއް ގާއިމުކުރުމަށް ފަހަތަށް ޖެހިވަޑައިގަތުމަށް ރަނިލް ވަނީ ނިންމަވާފަ އެވެ.
ލަންކާގެ މަޖިލީހުގެ ރައީސް 20 ވަނަ ދުވަހަށް ވޯޓު ތާވަލުކޮށްފައިވާއިރު އެމަގާމަށް އިދިކޮޅު ލީޑަރު ސަޖިތު ޕްރެމަޑާސާ ވާދަކުރައްވާނެ އެވެ. ސަޖިތު ވަނީ 2019 ވަނަ އަހަރު ލަންކާގައި ބޭއްވި ރިޔާސީ އިންތިހާބުގައި ވާދަ ކުރައްވައި ނާކާމިޔާބުވެފަ އެވެ. ނަމަވެސް މިފަހަރު އިދިކޮޅު އެންމެން އެކަތިގަނޑަކަށްވެއްޖެ ނަމަ، ސަޖިތަށް އިންތިހާބު ކާމިޔާބު ކުރެއްވޭނެ ކަމަށް އޭނާ ގަބޫލު ކުރައްވާ ކަމަށް ބީބީސީން ބުނެފައިވެ އެވެ.
ޖުލައި 19 ވަނަ ދުވަހު ކެންޑިޑެސީ ހުށަހަޅަން ޖެހޭނެ އެވެ. ލަންކާގެ މަޖިލީހުގައި ޖުމުލަ 225 މެމްބަރުން ތިއްބަވަ އެވެ. މި ވޯޓު ނެގުމަށް ނިންމާފައި މިވަނީ ހުރިހާ ސިޔާސީ ޕާޓީއެއްގެ ލީޑަރުންގެ މެދުގައި ބޭއްވި މަޝްވަރާތަކުގައި އެއްބަސްވެފައިވާ ގޮތަށެވެ.
ދީފައިވާ މުއްދަތުގެ ތެރޭގައި ބޮޑުވަޒީރާއި ރައީސް އިސްތިއުފާ ނުދެއްވާނަމަ ބުރާސްފަތި ދުވަހު މުޅި ގައުމުގައި މުޒާހަރާ ކުރާނެ ކަމުގެ އިންޒާރު ރައްޔިތުން ވަނީ ދީފަ އެވެ. އަދި، ލީޑަރުން އިސްތިއުފާ ދެއްވަން ދެން އެބޭފުޅުންގެ ގެކޮޅުތަކުން މުޒާހަރާކުރާ މީހުން ނުނުކުންނާނެކަން ވެސް ވަނީ އަންގާފަ އެވެ.
