ސްރީ ލަންކާގެ ރައީސްގެ މަގާމަށް ވަޑައިގަންނަވަން ބޭނުންވާ ކަމަށް އެ ގައުމުގެ މައި އިދިކޮޅު ލީޑަރު ސަޖިތު ޕްރެމަޑާސާ ވިދާޅުވެއްޖެ އެވެ.
ބީބީސީއަށް ދެއްވި އިންޓަވިއުއެއްގައި ސަޖިތު ވިދާޅުވީ "ރައީސްގެ މަގާމު ހުސްވެއްޖެ ނަމަ އަހަރެން ރައީސްގެ މަގާމަށް ކުރިމަތިލާން ޕާޓީ އާއި ކޯލިޝަން ޕާޓީތަކުން އެއްބަސްވެއްޖެ" ކަމަށެވެ.
ގޯސްކޮށް ބެލެހެއްޓުމުގެ ސަބަބުން ލަންކާގެ އިގްތިސާދު އިނދަޖެހި، ސަރުކާރާ ދެކޮޅަށް ރައްޔިތުން ނިކުތުމުން، ވަރަށް އަވަހަށް މަގާމުން އިސްތިއުފާ ދެއްވާނެ ކަމަށް ސްރީ ލަންކާގެ މިހާރުގެ ރައީސް ގޮޓްބާޔާ ރަޖަޕަކްސަ ވަނީ ވިދާޅުވި އެވެ.
ސަޖިތު ވަނީ 2019 ވަނަ އަހަރު ލަންކާގައި ބޭއްވި ރިޔާސީ އިންތިހާބުގައި ވާދަ ކުރައްވައި ނާކާމިޔާބުވެފަ އެވެ. ނަމަވެސް މިފަހަރު އިދިކޮޅު އެންމެން އެކަތިގަނޑަކަށްވެއްޖެ ނަމަ، ސަޖިތަށް އިންތިހާބު ކާމިޔާބު ކުރެއްވޭނެ ކަމަށް އޭނާ ގަބޫލު ކުރައްވާ ކަމަށް ބީބީސީން ބުނެފައިވެ އެވެ.
މިދިޔަ އޭޕްރީލް މަހު ލަންކާގެ ބޮޑުވަޒީރު ކަމުގެ މަގާމަށް ވަޑައިގަތުމަށް ސަޖިތަށް އެރުވި ދައުވަތު އޭނާ ގަބޫލު ކުރައްވާފައެއް ނުވެ އެވެ. މިހާރުގެ ބޮޑުވަޒީރު ރަނިލް ވިކްރަމަސިންހަ އެ މަގާމަށް ވަޑައިގަތީ އެއަަށްފަހު އެވެ.
ހުރިހާ ޕާޓީއެއް ހިމެނޭ އެއްބައިވަންތަ ސަރުކާރެއްގައި ބައިވެރިވާން ތައްޔާރު ކަމަށް ވެސް ސަޖިތު ބުނެފައިވެ އެވެ. އަދި އެފަދަ ސަރުކާރަކަށް ފުރުސަތު ދެއްވުމަށް އިސްތިއުފާ ދެއްވަން ތައްޔާރަށް ހުންނެވި ކަމަށް ރަނިލް ވިދާޅުވެފައިވެ އެވެ.
މި ނިމިދިޔަ ހަފްތާގެ ތެރޭގައި ލަންކާގެ ރައްޔިތުން ވަނީ އެގައުމުގެ ރައީސްގެ ގެކޮޅަށް ވަދެގަނެފަ އެވެ. ރައީސް ވީނުވީ ތަނެއް މިހާރު ނޭނގުނު ނަމަވެސް އެ ގައުމުން ބޭރަށް ފުރާވަޑައިގެންފައިނުވާ ކަމަށްވެ އެވެ. އެ ހަފްތާގައި ބޮޑުވަޒީރު ރަނިލްގެ އަމިއްލަ ގެކޮޅުގައި ވެސް ބަޔަކު ވަނީ ހުޅުޖަހައިފަ އެވެ. މުޒާހަރާ އިންތިޒާމް ކުރާ ރައްޔިތުން ބުނެފައި ވަނީ އެއީ އާންމުންގެ ބޮލުގައި ތުހުމަތު އެޅުވުމަށް ސަރުކާރުން ހިންގި އަމަލެއް ކަމަށެވެ.
