ވެރިކަމުން ދުރުވުމަށް ގޮވާލައި ބޮޑެތި މުޒާހަރާތަކެއް ކުރަމުންދާ ދަނޑިވަޅެއްގައި ރައީސްގެ މަގާމުން އިސްތިއުފާ ދެއްވުމަށް ސްރީލަންކާގެ ރައީސް ގޮތަބަޔާ ރާޖަޕަކްސާ ނިންމަވައިފި އެވެ.
ލަންކާގެ މީޑިއާތަކުން ރިޕޯޓުކޮށްފައިވާ ގޮތުގައި މި މަހުގެ 13 ވަނަ ދުވަހު އިސްތިއުފާ ދެއްވާނެކަން ގޮތަބަޔަ ވަނީ އެގައުމުގެ މަޖިލީހުގެ ރައީސަށް އަންގަވާފަ އެވެ.
އިސްތިއުފާ ދެއްވަން ގޮތަބަޔާ ނިންމެވިއިރު އެމަނިކުފާނުގެ ރިޔާސީ ގެކޮޅަށް މިއަދު މުޒާހަރާކުރާ މީހުން ވަނީ ވަދެގެންފަ އެވެ. އަދި، އެމަނިކުފާނަށް ޖެހުނީ އެތަން ދޫކުރައްވައި ވަޑައިގަންނަވާށެވެ. އަދިވެސް އެމަނިކުފާނު ހުންނެވި ތަނެއް އެނގިފައެއް ނުވެ އެވެ.
ލަންކާގެ ބޮޑުވަޒީރު ރަނިލް ވިކްރަމްސިންހަ ވެސް ވަނީ އިސްތިއުފާ ދެއްވާނެކަން ހާމަކުރައްވާފަ އެވެ. މި ދެ ބޭފުޅުން ވެސް އިސްތިއުފާ ދެއްވުމަށް ފަހު ގައުމީ އެއްބައިވަންތަކަމުގެ ސަރުކާރެއް އެކުލަވާލުމަށް ފުރުސަތު ދެއްވާނެ ކަމަށް ލަންކާގެ މަޖިލީހުގެ ރައީސް މިއަދު ވިދާޅުވި އެވެ.
ލަންކާގެ ސަރުކާރާ ދެކޮޅަށް ކުރަމުންދާ މުޒާހަރާތަކުގައި ބައިވެރިވުމަށް އެތައް ހާސް ބަޔަކު ވަނީ ކޮލޮމްބޯއަށް ދަތުރުކޮށްފަ އެވެ. ކޮލޮމްބޯ ހިމެނޭހެން ހަތް ސަރަހައްދެއްގައި ވަނީ ކާފިއު ވެސް އިއުލާނުކޮށްފަ އެވެ. ލަންކާގެ ސިޔާސީ މަޝްރަހުގައި ފާހަގަކޮށްލެވޭ ބޭފުޅުން ވެސް އަންނަނީ މި މުޒާހަރާތަކުގައި ބައިވެރިވަމުންނެވެ.
މިދިޔަ މާޗް މަހުގެ މެދެއްހާ ހިސާބުން ފެށިގެން ގޮތަބަޔާގެ ގެކޮޅުގެ ބޭރުގައި އާންމުން ދިޔައީ ކޭމްޕު ޖަހައިގެން މުޒާހަރާ ކުރަމުންނެވެ.
ސްރީލަންކާ ސޮވެރިން ޑިފޯލްޓަކަށް ގޮސްފައިވާއިރު އިންފްލޭޝަން ރޭޓު ހުރީ 54.6 ޕަސެންޓަށް ވުރެ މަތީގަ އެވެ. އަދި، ބޭހާއި ތެލަށް ވަނީ ޖެހިފަ އެވެ. އޭގެ އިތުރުން ކޮރަޕްޝަނާއި ނުފޫޒުގެ ބޭނުން ކުރަމުންދާތީ ވެސް ލަންކާގެ ރައްޔިތުން ތިބީ މި ސަރުކާރާ މެދު ވަރަށް ބޮޑަށް ހިތްހަމަނުޖެހިފަ އެވެ.
އެގައުމަށް ދިމާވެފައިވާ އިގްތިސާދީ ކާރިސާއިން ސަލާމަތްވާނެ ދުވަހެއް ވެސް ނޭނގެ އެވެ.
