ތަފާތު ކުޅިވަރުތަކާއި، ގިނަ ހަރަކާތްތަކާއެކު މިފަހަރު އެންމެ ކުލަ ގަދަކޮށް އީދު ފާހަގަ ކުރާ އެއް ރަށަކީ ނ. ވެލިދޫ އެވެ. އެހެން އަހަރުތަކަށްވުރެ ބޮޑުކޮށް މިފަހަރު ވެލިދޫގައި އީދުގެ ހަރަކާތްތައް ކުރިއަށް ގެންދާއިރު، ކައިރި ރަށްތަކުންނާއި، މާލެއިން މީހުން ގޮސް އެރަށް ވަނީ ފުރާލާފަ އެވެ.
މިފަހަރު ވެލިދޫގައި ބޮޑު އީދެއް ފާހަގަ ކުރުމުގެ ފަހަތުގައި ވަނީ ދެ ސަބަބެކެވެ. އެއީ ފާއިތުވި ދެ އަހަރު ކޮވިޑްގެ ސަބަބުން އީދު ފޯރި ނެގުމުގެ ފުރުސަތު ނުލިބުމާއި، އެރަށު ކައުންސިލުގެ އިސްނެގުމުގެ މަތިން އެރަށް ފަތުރުވެރި މަންޒިލެއްގެ ގޮތުގައި ޕްރޮމޯޓް ކުރުމަށް ހިންގާ "ވިޒިޓް ވެލިދޫ" ހަރަކާތުގެ ވެބްސައިޓް ލޯންޗު ކުރުން އީދު ތެރެއަށް ތާވަލުކޮށްފައި އޮތުމެވެ.
ނ. ވެލިދޫ އީދު ކުޅިވަރުތަކުގެ ތެރެއިން "ބައޮކަލީ އީދު މަޅި"
ވެލިދޫގެ އީދު ހަރަކާތްތައް ފެށުނީ ރެ އެވެ. "ބައޮކަލޯ އީދު މަޅި"ން ރޭ އީދު ކުޅިވަރުތައް ފެށިއިރު، ރޭ ވަނީ ރަންފޮށި އުފުލުމުގެ ހަރަކާތެއް ވެސް ބާއްވާފަ އެވެ. އަދި ރޭ މެންދަމު އެ ރަށުގައި ވަނީ އީދުނެރުމުގެ ހަރަކާތެއް ވެސް ބާއްވާފަ އެވެ.
އެއަށްފަހު މިއަދު ހެނދުނު އެރަށުގައި އީދުގެ ހަރަކާތްތައް ފެށީ އީދު ނަމާދާއި، ނަމާދަށްފަހު ބޭންކް އޮފް މޯލްޑިވްސް ވެލްދޫ ބްރާންޗުން ސްޕޮންސާކުރި އީދު ސަޔަކުންނެވެ. އީދު ސަޔާއި މުބާރަކުބާދީއަށްފަހު މިއަދު ހެނދުނު 10:00 ޖެހިއިރު ވެލިދޫގައި ވަނީ ތިންމުގޯލި މުބާރާތެއް ބާއްވާފަ އެވެ.
ނ. ވެލިދޫ އީދު ކުޅިވަރުތަކުގެ ތެރެއިން އާއިލީ ހަވީރު
ވެލިދޫގެ ކުދި ބޮޑު އެންމެނަށް ބައިވެރިވެވޭނެހެން ގިނަ ހަރަކާތްތަކެއް ކުރިއަށް ގެންދާއިރު، މިއަދު ހަވީރު އެރަށުގައި ވަނީ އާއިލީ ހަވީރެއް ބާއްވާފަ އެވެ. އަދި އެރަށު ޒުވާނުންގެ އިސްނުގުމުގެ މަތިން މާލީ ބަތްތެލި ހަރަކާތެއް ކުރިއަށް ގެންގޮސްފަ އެވެ. މިއީ ވެލިދޫގައި މުޅިން އަލަށް ކުރިއަށް ގެންދިޔަ ހަރަކާތެކެވެ.
ނ. ވެލިދޫގެ އީދު ފާހަގަކުރުމުގެ ތެރެއިން މާލީ ބައްތެލި
ރާއްޖޭގެ މަޝްހޫރު ބޭންޑެއް ކަމަށްވާ އިކުއަޓިކް ވައިބުން މިރޭ ވެލިދޫގައި ޝޯ ދޭން ހަމަޖެހިފައިވާއިރު، ޝޯގެ ކުރިއަށް ވަނީ މުހިންމު ހަރަކާތެއް ތާވަލުކޮށްފަ އެވެ. އެއީ ވެލިދޫއަށް ފަތުރުވެރިކަން ޕްރޮމޯޓް ކުރުމަށް ކުރިއަށް ގެންދާ ވިޒިޓް ވެލިދޫ ހަރަކާތުގެ ވެބްސައިޓު އިފްތިތާހު ކުރުމެވެ. މިއާއެކު އެރަށުގައި ހަވާއެރުވުމުގެ ހަރަކާތެއް ބޭއްވުމަށް ވެސް ވަނީ ހަމަޖެހިފަ އެވެ.
ވެލިދޫއަކީ އަކީ 2500 އަށްވުރެ މީހުންގެ އެކުވެރި އާބާދީއެއް އޮންނަ ރަށެކެވެ. އެރަށުގެ ޒުވާނުން އެންމެ ގިނައިން އުޅެނީ ރިސޯޓް ވަޒީފާތަކުގަ އެވެ. ވެލިދޫގައި އިގްތިސޯދީ ގޮތުން ކުރާ މަސައްކަތްތަކަކީ މަސްވެރިކަމާއި ދަނޑުވެރިކަމުގެ އިތުރުން ފަތުރުވެރިކަމުގެ ދާއިރާގައި ވަޒީފާ އަދާ ކުރުމެވެ.
